Shillong, Nailar 21 : Ki Pulit ka Ri-Bhoi District, kila ioh ban pynpulom ia ka jingthmu pynbthei bomb Improvised explosive device (IED) jong ka seng Hynniewtrep National Liberation Council (HNLC) bad ioh kem ia 3 ngut ki ehrang na Ri-Bhoi bad na West Jaintia Hills District.
Kine ki 3 ngut ki ehrang ka HNLC ki kyrteng u Equest Langsiang (31), u Deiborlangki Sariang (31) bad u Markhlan Biam (34). Ia u Langsiang la kem na Nongpoh, Ri-Bhoi bad ia u Sariang uba dei na Nartiang bad u Biam na laskein la kem na Nartiang bad na Jowai.
U Superintendent of Police ka Ri-Bhoi Jagpal Singh Dhanoa, u pyntip ba ia kane ka jingthmu jong ka HNLC la ioh ban pynpulom da ka jingiohkem ia uwei u briew ba kyrteng u Equest Langsiang (31 snem) na lad Bethany Hospital, Nongpoh, hynnin ka sngi Ba-ar por 12:30 baje mynsngi.
U pyntip ba kat kum ki jingtip bala ioh lum, u Equest u dei u ehrang ka HNLC bad ula iasuhbuit bad ki dkhot ka HNLC lem bad kiwei ki briew bym lah ban tip, ban leit buh bomb IED ha kylleng ki jaka ka Ri-lum Khasi bad Ri-lum Jaintia.
U pyntip ba u Equest, ki Pulit kila ioh kurup ia ki sakhi satar na ka phone jong u bad kila register case pyrshah ia u ha Nongpoh Police Station hapoh ka kyndon 113(3) (5) BNS.
U iathuh ba ha ka jingtohkit, u Equest ula kubur ba u dei u ehrang ka HNLC bad ula iasuhbuit ban buh bomb IED lem bad kiwei ki ehrang ka HNLC. Ula phla ruh ia ka kyrteng jong kine ki ehrang kiba thmu ban iabuh bombIED.
Kine ki ehrang ki dei u Deiborlang Sariang ba 31 snem, uba dei na ka shnong Nartiang, West Jaintia Hills bad u Markhlan Biam ba 34 snem, uba dei u Laskein, West Jaintia Hills.
Halor kane ka jingphla, ki Pulit kila pynlong ia ka jingkhynra bad kila iohkem ia kine ki arngut na Jowai bad na Nartiang.
U Dhanoa u pyntip ba kine ki 2 ngut ruh kila phla ba ki dei ki ehrang ka HNLC bad ki dei ruh kiba thmu ban pynbthei bomb ha ka 14 bad 15 tarik Nailar, 2024 halor ka jingbthah jong ki Nongialam ka HNLC kiba don ha Bangladesh.
 na lad Bethany Hospital, Nongpoh, hynnin ka sngi Ba-ar por 12:30 baje mynsngi.){kind=link}