Shillong, Rymphang 20: Ki kynhun hati khlaw kiba wan wad jingbam, kila rung sha ki thain ka shnong Darechikgre kaba don kham pajih naka nongbah Tura hynne ka step sngi Ba-ar bad kila pynpra iaki jaka sah Cottage jong kawei ka jaka jngohkai kaba dang don hapdeng ka jingpyntrei.
Kum kane ka jingjia kala jia teng dangshen haka taiew bala dep.
La iathuh ba ki nongtrei kiba don ha kane ka jaka jngohkai kila phet noh na kane ka jaka hadien ba kila iohi iaki hati kiba rung sha kane ka Complex.
Namar ka jingshep tieng iala ka jingim, kine ki nongtrei kiba don ha kane ka Complex kila rieh hajrong tnum bad kila pyrshang ban beh iaki daka ba tieng iaki tin ba tap ïing ban pyntip ruh sha ki nong shong shnong.
Watla kam don kano kano ka jingjia ba sngewsih, hynrei kine ki hati khlaw kila pynjulor iaki PVC Pipe, ki Wire Fencing, ki Plastic top um.
Haba kren sha ki lad pathai khubor ka Ava Shereen S Sangma ka Tourism Officer jong ka West Garo Hills kala ong “Hadien bala ioh jingtip, ngi la pynlong ka jingtohkit bad la sakhi ba kala don ka jingshah pynjulor. Iaki ba trei ha kane ka Project la pynkynriah noh sha Nokma Residence bad haka por sngi kin sa leit ban trei biang ban pyndep iaka Project”.
Haba kylli, ka Ava kala ong “Ka shnong haka jingtohkit. Ka lah ban shim por bad ka shong ruh haki Contractor kiba pyntreikam iaka Project”.
Lah ban kdew kane ia kane ka Proejct la pyntrei hapoh ka Swadesh Darshan.
