Shillong, Nohprah 05 : Ka Sorkar Jylla bad ka Elaka Saitsohpen ha ka sngi Thohdieng, kila iasoi ia la dulir jaka ka ban sah khana pateng la pateng, kaban pynkut noh ruh ia ka jingiakajia jaka bala iaid 45 snem naduh u 1982.
Lyngba kane ka soskular, ka Sorkar Jylla kala pynphai noh ia ka jaka ba 128 acre jong ka sha ka Elaka Saitsohpen.
Haba ai jingkren ha kane ka jingialang, u Symbud Myntri Rangbah Bah Prestone Tynsong ula wad ia ka tynrai jong kane ka jingiakajia jaka kaba sdang ha ki snem 1820 shaneng, ha ka por ba ia ki jaka jong ka thain la aiti sha ka Sorkar Bilat.
Ula pynpaw ruh ba kum kane ka jingjia kala jia ha Tura ha kaba haduh 200 acre ka dang hap hapoh ka jinglong trai ka Sorkar Jylla, kaba pynlong ia ki nongshongshnong ba kin pyndonkam ia ka jaka da kaba iatehkular ban shu shim wai lane siew ia ka bailutksan sha ka Sorkar.
Ula ban jur ba ka Saitsohpen ka kham pher, naba ka Sorkar kala pynphai noh ia baroh 128 acre sha ka Elaka, ym kum ka jaka shim wai hynrei ka jinglong trai ba pura. Ula batai ia ka Saitsohpen kum ka “Jabieng jong ka subdivision” namar ka jingdon bun ki Ophis Sorkar ha ka thain bad ai jingiaroh ia ka jingpyrshang ba khlem sangeh jong ka Dorbar, ki nongialam ka Elaka bad ki paidbah kiba la iakhun ia kane ka kam da ki snem.
Haba kren halor ki jingkiew shaphrang ha ka roi ka par hapoh ka Sorkar MDA, u Bah Prestone ula kdew ia ka jingplie paidbah ia ki skhim bapher bapher da u Myntri ka DoNER bad u Myntri Rangbah ha Sohra, kumjuh ruh ka shna pynbha surok Umtyngar-Shella ka ban sa sdang shen. Ula kdew ruh ia ki project kam pynroi kiba heh, kynthup ka jingpynkylla ia ka Crowborough Hotel ha Police Bazaar sha ka hotel 5-star, kaba pyni ia ka jingkut jingmut jong ka Sorkar ban pynkylla ia ka Meghalaya wat hapdeng ki jingpynrem na kiba bun ki liang.
U MLA ka Sohra Bah Gavin M Mylliem ula ong ba ka jinglah ban pynbeit ia kane ka jingiakajia kaba la neh la slem bha ka la urlong namar ka jingiatreilang kum ka kynhun hapdeng ka Sorkar MDA bad ka Elaka Saitsohpen hapoh ka jingialam jong u Myntri Rangbah Conrad K Sangma.
U MLA ka Shella Bah Balajied Kupar Synrem ula pynpaw ba bun ki project kam pynroi ha Saitsohpen kila shu sahkut da ki phew snem namar ka jingbym shai ia ka hok trai jaka. Mynta bala pyndep ia ka jing iatehkular bad bala pynskhem ia ka jinglong yrai, ka Sorkar kan lah ban pyniaid noh shakhmat ia ki kam kiba la sahteng lah slem bha.
Ula pynbna ba ki project ba kot T.114 klur yn sa pyntreikam noh hapoh ak Elaka.
