Shillong Nohprah 06: U Symbud Myntri Rangbah ka jylla u Bah Prestone Tynsong hynne ka sngi Balang ula pyntip ba ka Ministry of Home Affairs (MHA) jong ka sorkar pdeng kala pynpaw baka jingbuh iaka Facilitation Centre ne Check Gate kat kum ka MRSSA B, 2020 ka dei kaba iatakhuh bad ki aiñ ba la mynjur da ka Parliament.
Haba iakren bad ki nongthoh khubor u Bah Prestone Tynsong ula ong ba ka ministry kala pynpaw ba ka jingbuh iaka Facilitation Centre kan ktah bad pynthud ia ka leit ka wan jong ki paidbah na kawei ka jylla sha kawei pat da kaba buh ha kajingpyrkhat ba ka jylla Meghalaya kadei ka jaka kaba rung ban leit sha kiwei pat ki jylla.
Ula ong ba ka sorkar jylla kala shim ia ka rai ba shen kan sa lum ia ka jingialang baroh kiba donbynta ban pan ia ki jingai jingmut bad ki jingpynsngew na iwei pa iwei halor katei ka kam.
“Ngin sa leh ia katei, hynrei kumba long mynta u Myntri Rangbah u dang bunkam bha bad ngi khmih lynti ba shen u Myntri Rangbah yn sa lum noh ia katei ka jingialang bad baroh kiba don bynta” ong u Bah Prestone.
Ha kaba iadei bad ka Inner Line Permit (ILP), u Bah Prestone ula ong, “Ka ILP kadei da kawei pat ka mat bad ka MRSSA ruh kadei da kawei patka mat. Ngi pynbor ba ngi dei ban ioh noh ia ka ILP namar ba kadei ka ain jong ka sorkar pdeng. Ka ain jong ka sorkar pdeng ha ka por ba kila mynjur ia katei ka ai, kala don lypa ka kyndon, kaba ong, ba dei ban leh ia kane khamtam ia ka Meghalaya kaba dei ka jylla kaba iaid lyngba ban leit sha kiwei pat ki jylla bad hap ban leh ia katei. Phi hap ban leh ia katei ba ban pynthikna ba ka jingiaid ki kali bad ki briew kam dei ban shah ktah bad kane kadei ka ILP”.
“Hynrei ma ki (MHA) kila kdew ba ka MRSSA ka iatakhuh bad ka ain jong ka sorkar pdeng, namar kino kino ki nongshong shnong ha ka ri India ki lah ban rung laitluid na kawei ka jylla sha kawei pat bad kam don kano kano ka ain kaban khanglad ia ki ban leit na kawei ka jylla sha kawei pat. Kadei ka mat kaba iapher na kawei sha kawei pat. Lada ki ai ia ka ILP, kin don iaki kyndon ba kam dei ban don ka jingpynthud ne ka jingpyndik ia ki briew kiba iaid lyngba ka jylla” ula ong.
U Bah Prestone ula ong ba ka sorkar jylla ka dang buddien bad ka sorkar pdeng ban pyntreikam noh mardor iaka ILP.
 jong ka sorkar pdeng kala pynpaw baka jingbuh iaka Facilitation Centre ne Check Gate kat kum ka MRSSA B, 2020 ka dei kaba iatakhuh bad ki aiñ ba la mynjur da ka Parliament.){kind=link}