Agartala, Rymphang 08: U Myntri Iada ri ka sorkar pdeng, u Rajnath Singh ha ka sngi ba Ar ba la lah u la ong ba ka BJP kan jop ha palat 50 tylli ki seat ha kane ka ilekshon assembly ha Tripura.
U Rajnath Singh u la pynlong ka jingleit jurip sha Tripura shibynta ban ialap na ka bynta ki kyrtong jong ka seng BJP na ka bynta kane ka ilekshon ka ban wan.
Haba aijingkren ha ki rally paidbah ha ka thain shatei bad sepngi ka Tripura, u Rajnath Singh u la ong; “Ka Congress bad ka CPI-M ki la don ka jingiasngewthuh jingmut ha kaba iadei bad ka rukom ia bhah ia ki seat, hynrei kin ioh nod ha kane ka ilekshon ka ban long ha une u taiew u ban wan.Ki paidbah ki tip bha ia ki.Ha ki san snem kiba la dep ka party jong ngi hapoh ka jingialam jong u Biplab Kumar Deb bad u Dr Manik Saha kila trei na ka bynta ka roi ka par jong ka jylla Tripura.”
“Nga la wan jngoh ia ka Tripura la bun bunsien ha kine ki 20 tylli ki snem kiba la leit noh.Shisien ka Tripura ka dei ka jylla kaba la shah ktah jur na ki kam lehnoh, ki kam iaumsnam bad ki kam rahbor, hynrei mynta hapoh ka jingsynsahr ka BJP, ka jingsuk ba pura kala wanphai pat.Ka sorkar jong ngi ka la iasoi ia ka jingiateh jingsuk bad ka kynhun kieng atiar KPLT lem bad kiwei pat ki kynhun kieng atiar khnang ba kin wanphai pat sha ka lynti kaba dei,” ong u Singh.
Da kaba kynthoh tyngeh ia ka CPI-M, u Singh u la ong ba hapoh ka jingsynsahr ka jong ki, ki briew ki im hapdeng ka jingsyier bad ka jingsngew kutlad namar kila pyndonkam bakla ia ki nongshong shnong ka Tripura.
“Ka sorkar CPI-M kam shym la ai satia ia kino kino ki jingkyrshan na ka bynta ki longkmie, hynrei ha ka jingsynshar ka BJP, ki la ioh ia ka burom bad ki jingmyntoi kata nalor 33 percent ka bhah kyrpang hapoh ki kam sorkar.Ngi la kut jingmut ban trei na ka bynta ka roi ka par jong ka Tripura bad ki briew ki jong ka,” ong shuh shuh utei u myntri ka sorkar pdeng.
Shuh shuh utei u Myntri u la ong ruh ba ki kam iaumsnam ki la sangeh ha Tripura hapoh ka jingsynshar ka BJP.U la ong ruh ba na ka liang u Myntri Rangbahduh (PM) Narendra Modi u la kular ban pynioh ia ka surok HIRA (Highway, I-way, Railway bad Airway) na ka bynta ka Tripura.
