Aizawl, Iaiong 25 :Haba plie ia ka Science-Technology-Innovation (STI) Hub ha nongbah Aizawl hynne ka sngi kum shibynta jong ka ‘C20 working group on Education & Digital Transformation,’ u Lat ka jylla Mizoram K. Hari Babu u la ong ba ka India ka la jam shakhmat ha ka jingtreikam ka digital system.Ym tang ba ngi la don ha ka lynti sha ka jingpyntreikam ia ka 6G, hynrei mynta ngi la pyndonkam ia ki jing khein jingdiah kiba iadei bad ki jingpynlut pynsep ki jong ngi da kaba pynshong nongrim halor ka jingdonkam lyngba ka kor digital.
“Kham hashwa, ngi ju khein ia ki jingpynlut jingsep jong ngi kiba ngi donkam man ka sngi kum ha kaba thied ia u ruti, makhon bad ki jain ki nep bad ka jaka shong jaka sah. Hynrei, ha kane ka juk digital kaba mynta, kine kiei kiei baroh ki la kylla lut namar ki jingdonkam kiba kongsan ki la iaid palat na kine ki laitylli ki bynta kiba la kdew haneng. Mynta, ngi la donkam ban khein ia ki jinglut kiba iadei bad ka pule puthi. Ha ka imlang sahlang kaba mynta, ki jinglut jingsep kiba iadei bad ka pule puthi kila ia ryngkat bad ki jingpynlut ha ka bam ka dih bad kiwei pat ki jingdonkam ba man ka sngi. Ki jingpynkut kiba iadei bad ka pule puthi ki kynthup ia ki tiar kiba ngi pyndonkam ban ioh jingstad,” ong u Lat.
U Lat u la ong ruh ba ka India ka la kylla long ka shlem wad jingstad kaba pawkhmat.
Kumta ruh, ka jingai jingkhein kaba shisha ban thew ha kaba iadei bad ka ioh ka kot kam dei lyngba ka GDP jong ka, hynrei ka GDKP! Ka Gross Domestic KNOWLEDGE Potential ! Ka ‘K’ factor, kaba dei ka bynta jong ka jingnang jingstad ka long kaba kongsan, bad ka India kala kham iaid shakhmat ban ia kiwei pat ha kaba iadei bad kane ka bynta.
Ka pule puthi bad ka jingnang jingtip, nalor ka jingpyndonkam ia ka technology ban kyntiew ia ka pule puthi bad ki jingnang jingtip, ki long ki jingthew kiba shisha kiba pynpaw halor ka jingseisoh bad ka jingkiew shaphrang jong ka ri.
Ka ‘Working group on Education and Digital Transformation under C20’ ka dei kaba la khlieh da ka Dr Prema Nedungadi, chairperson of AmritaCREATE, jong ka Amrita Vishwa Vidyapeetham.Na ka liang u Myntri Rangbahduh (PM) Narendra Modi u la thung ia ka Ma Amritanandamayi Amma jong ka Chair jong ka C20 kaba dei ka Civil 20 group kaba hap hapoh ka kynhun G20.Ka India ka la ioh ban bat ia ka kam president jong ka G20 na ka bynta mynta u snem.
Haba kren ha katei ka jingialang ka Chief Secretary ka Mizoram ka Dr Renu Sharma ka la ithuh ia ka jingtrei borbah jong ka sorkar u PM Modi ba mynta ha kaba iadei bad ka jingkyntiew ia ka jingnang jingtip lyngba ka digital, hynrei ka la ban ruh halor ki jingshisha ba donkam ban kyntiew halor ki jingdonkam kiba iadei bad ki jaka treikam kiba iadei bad ki digital lyngba ki jingbei tyngka sha ka jylla.
Watla katta ka la pynpaw ka jingsngew sarong ba ka jylla Mizoram ka wan ha ka kyrdan kaba ar ha kasba iadei bad ka percentage ka jingkiew ha ka liang ka pule puthi hapoh ka ri baroh kawei, kata hadien tang ia ka jylla Kerala.Ka la ong ruh ba ka kolshor jong ki trai shnong ka la ioh ka jingkyrkhu lyngba ka jinglong maria ryngkat dor hapdeng ki kynthei bad ki shynrang bad kumta ruh ka jingkiew ha ka jingnang jingstad hapdeng ki kynthei ka Mizo ka long haduh kumba 89.7 per cent.
