Guwahati, Iaiong 02: U Myntri Rangbah (CM) ka Assam u Himanta Biswa Sarma u la pyni iala ka jong ka sap ha ka jingialehkai kriket kaba kyrpang ba la pynlong ha Guwahati ha kane ka janmiet sngi Saitjain ba la lah.
Kane ka jingialehkai kriket ka dei shibynta jong ka jingrakhe ia ka Platinum Jubilee jong ka iingbishar Gauhati High Court, ha kaba ka kynhun Chief Minister XI bad ka Chief Justice XI kila ia aireng ha kane ka tournament.
Hadien ba la kut ka jingialehkai baroh ki ar kynhun la pynbna kum ki nongjop hadien ka jingiakhaid. Ha kane ka jingialehkai la sakhi ruh ia ka jingwan iashim bynta jong u Chief Justice Sandeep Mehta, ki nongbishar ka high court, ki dkhot ka kynhun myntri bad ki MLA.
Hadien ka jingialehkai, na ka liang u CM Sarma u la pynpaw ka jingkmen kaba khraw da kaba ong, “Ka dei ka jingialehkai kaba sngewtynnad shibun! ” Ia ka khusnam ‘Man of the Match’ la ioh rah da u Vijay Deb.
