Shillong, Jylliew 01: U Myntri ka tnat Pule Puthi Rakkam A Sangma hynne ka sngi Palei ula pyntip ba ki skul bad ki jaka pule hapoh ka jylla kila pynpaw ba kim lah ban pyntreikam iaka National Education Policy (NEP) 2020 mynta u snem.
Haba kren sha ki lad pathai khubor u Rakkam ula pyntip ba ha kine ki khyndiat sngi bala dep, ki nongpyniaid skul bad Kolej naduh ka North Eastern Hills University (NEHU) bad ka Principal Council jong jylla kila wan kynduh ia u bad kila pynpaw iaka jingbym kot bor ban pyntreikamiaka NEP 2020 naduh mynta u snem.
“Ka long kaba donkam ban pyntreikam iaka NEP 2020 hynrei namar ba bun ki nongiaid skul bad kolej ka jylla kila pyntip ba kim lah ban pyntreikam naduh mynta u snem, ka sorkar ruh kala phah ktien sha baroh ki nongpyniaid skul ba kidei ban phah daka jingthoh, iaki jingeh ba ki iakynduh” la ong u Rakkam.
U Rakkam ula ong ka NEP 2020 ka dei kaba biang tam namar ka thong kadei hi ban kyntiew iaka pule puthi jong ka jylla bad ka ri India hynrei ki don shibun ki jyrwit jyrwat ba ki jaka pule ha Meghalaya ki shem jingeh ban pyntreikam iaka NEP naduh mynta u snem.
Ula ong ba katkum ki kyndon ka NEP, la bthah ba baroh ki jaka Pule kidei ban don iaka Multi Disciplinary Courses, kidei ban biang lut ki jingtei, ki nonghikai kidei ban tbit bad dei namar kane ki jaka pule hapoh ka jylla ki dang shem jingeh ban pyntreikam lut ia baroh ki jingbthah ka NEP 2020.
“Ka tnat Pule ka don iaka thong ban pyntreikam noh dang kloi iaka NEP hynrei namar ba ki jaka pule hapoh ka jylla kim pat mynjur, ka sorkar kan ialeh katba lah ban iarap iaki jaka pule ban pynthikna ba naduh 2024-2025 yn lah ban pyntreikam iaka NEP 2020” ula ong.
