Shillong, Nailar 31 : Ki bor pyniaid distrik jong ka East Khasi Hills ha ka sngi Ba-ar ki la pynmih ka jingmaham na ka bynta ka jingshngain ki paidbah lane ki nongleit peitkai kumjuh ki nongshim bynta ha ki tamasa ne ki lympung bapher bapher kiban sa long ha ka distrik.
Katei ka jingmaham ka dei na ka bynta baroh ki kynhun kynthup naduh ia ki bor sorkar, ki bym dei sorkar, ki kynhun niam, ki jaka pule, ki kynhun ialehkai bad wat ia ki kynhun khaii pateng kynthup wat ia ki seng sainpyrthei nalor kiwei kiwei ki prokram ba kin hap ban bud pyrkhing.
Ka kyrwoh na ki bor pyniaid distrik ka ong ruh ba katei ka sienjam kadei hadien ba ki la don ki jingjia kiba la sakhi ia ka jingtuid bun jong ki paidbah bad ki nongpeitkai.
Bad dei na katei ka daw la bthah ia ki bor pyniaid ba kin kiar katba lah na kaba pynieng ia ki dara ba shu ieh malu mala na ka bynta ki nongwan namar kine ki lah ban buh kylla pat ka jingma ia kiba bun.
“Baroh ki dara ba shu buh lada pynieng dei ban leh da kiba la don jingtbit bad pyntikna ba ki skhem, nangta ban buh ia ki help-desk, ki first-aid bad ruh ka ambulance kum ka jingpynkhreh lypa,” ong ka kyrwoh.
Nalorkata la bthah ruh ia ki bor pyniaid ba kin pyntikna ba kan don ka jingpyntip haba iadei bad ki jingpynkhreh na ka bynta ki jignialehkai, ki tamasa lane kiwei kiwei sha ki paidbah la ka long lyngba ki jingpyntip paidbah lane lyngba ki lad pathai khubor. Kitei ki jingpyntip ki dei ruh ban long naduh ka tarik, haduh ka por bad ki prokram kiban don ha kato ka jaka kynthup ia kapor katno baje plie bad katno baje khang, nangta ka jingrung jingmih ki kali bad ruh wat ia ki entry pass lada donkam ban leh.
La kyntu ruh ba ki bor pyniaid ki dei ruh ban pyntip ki ei ki tiar ba ki lah ban rah shapoh bad kiwei ki bym shah ban rah khnang ba ki paidbah nongwan kin tip lypa.
Kawei pat ka jingbthah ka long ba ka jingai live ia ki prokram ialehkai lane ki prokram kum ka phutbol, ki tamasa rwai lyngba ki giant screen ha kylleng ki jaka kan iarap ban teh lakam ia ka jingtuid lymbung ki paidbah sha kawei ka jaka.
La bthah ruh ia ki bor pyniaid ba ki dei ruh ban da don ia ki lynti bad ki jingkdew hangno ka don ka jaka rung bad hangno ka jaka mih ha bun ki jaka, nangta ban pynbiang ia ki jaka leit shabar, ki first aid centre bad jaka rung jaka mih. La kyntu ruh ban da buh ia ki contact number khamtam na ka bynta ki help-desk, police bad fire and emergency services na ka bynta ban pynsuk ia baroh.
La bthah ruh ia ki paidbah ba ki dei ban tip ia ka rukom registar lane ka leit ka wan bad lada lah ki dei ban leh lypa shwa ka por ban ym ia tur than ha ka sngi khatduh.
La bthah ia ki nongpyniaid ba kin peitngor ia ka rung ka mih ki paidbah da kaba buh ia ki CCTV ha ki bun jaka bad ban phah peitngor man ka por.
Kawei ruh la ong ba ki deiban don ruh ia ki kor pynsawa ha ki jaka jaka ban pyntip ia ki paidbah lada don kino kino ki jingpynbna ha kaba ki nongpynbna ki dei ban pynbna ha ki ktien ba kren paidbah bad ruh ban pyntip ia ki jaka nangno ban mih lada don kino kino ki jingjia ba kyrkieh.
La bthah ruh ba ki bor pyniaid ki dei da buh jingshai ha ki jaka ba ki pynieng ki kynroh nar lane ki kynjri khnang ba ki paidbah kin ym ia tur ne ur haba don ka jingiabeh ban rung shapoh khamtam ha ka por mynmiet bym iohi.
La bthah ruh ia ki dukan lane ia ki nongdie jingdei ba ki dei ban long beit tang ha kawei ka liang bad dei ban ruh ban don ka jaka ba lait lai ne saw meter hapdeng ki 5 bad 6 tyli ki dukan ban ym syndait lang hajuh baroh.
Kawei pat ka jingbthah ka long badei ban pynbiang ia ki volunteer, ki nongpahara kiba lah ban ithuh da kaba phong ia ki uniform lane ki identity card. La bthah ruh ia ki paidbah ba kim dei satia ban bret pathar ia ki song jingbam lane ki jingdih um hynrei ha ki jaka ba la buh kyrpang.
Ban kiar na ki jingjia ba iadei bad ka ding ne ka bording, ki bor pyniaid ki dei ban pyntikna ba la bud pyrkhing ia ki kyndon kiba iadei bad ka. La bthah ruh ba ia ki generator, ki circuit breaker bad kiwei kiwei dei ban buh ha ki jaka ba shngain.
La bthah ruh ba ki bor pyniaid ki dei ban da buh ha ka jaka ba iohi ia ki jingbit ba ki la ioh na ka sorkar laen na ka ophis jong ka Deputy Commissioner ryngkat ki kyndon ba kin bud pyrkhing bad ruh ban pan jingiarap na ki bor pulit bad kiwei ki tnad sorkar na kabynta ban pyniaid beit ia ka prokram baroh.
