Shillong, Rymphang 26 : Ka Tnad ka Koit ka Khiah ka Jylla ha ka sngi Palei, kala pynmih ia ka jingbthah halor ka koit ka khiah ia u paidbah hadien ka jingioh khubor ba don kiba ngat ia u khniang jingpang meningococcal ha East Khasi Hills.
Ka State Survellance Unit ka pyntip ba kala pynlong ia ka jingtohkit ba iadei bad ka jingsaphriang une u khniang, ka jingbuddien ia ki briew kiba iakynduh ia ki briew ba kit jingpang, bad ka jingbishar ia ki jingleh test ha ki laboratory.
“Ngi la buddien bha ia ka jinglong jingman bad ia mynta hi la lah ban tehlakam ia ka, bad ym don shuh ki briew ba shem ba ki dang ngat thymmai ia ka jingpang ha kiwei kiwei ki jaka” ong ka jingbthah.
Ka Tnad ka kyntu ia ki paidbah ba kin phong ia ki mask lada kim sngew shait lane haba ki don ha ki jaka paidbah, sait bha ia ki kti, kiar na ki jaka ba ialum bun briew bad ialeh ban bam ia ki jingbam ba tei.
La bthah ban pyntip mardor sha ki jaka sumar lada jia ryngkhat ba kem jingpang shit ba kynsan kynsan, ka jingking khlieh, prie, mih khniang purple, ba kylla rong ki kti ne kjat.
“Ka Tnad ka bthah ia ki paidbah ba kin ialong jai jai bad sangeh ban pynphriang ia ki jingtip kiba khlem pat pynshisha” ong ka jingbthah haba pynpaw ba ka jinglap kloi bad jingshim ia ki lad jingiada ki long kiba kongsan bha bad ki paidbah ki lah ban phone ha u nombor 14410 helpline ba kin ioh ia ki jingsumar ba kyrkieh.
