Shillong, Rymphang 26 : Ki Pulit ka East Jaintia Hills ha ka sngi Palei, kila khynra ia ki par tih dewiong beain ha ka thain Umthe bad ioh kem haduh 9 ngut ki nongbylla tih dewiong bad ioh kurup haduh 55 MT u dewiong beain.
“Ha ka 26 tarik Rymphang, haba shimkhia ia ki jingtop ba ngi ioh na ka jingsyntiat ki drone, ngi la pynlong ia ka jingkhynra ia ki par dewong ha Umthe. Ha ka jingkhynra, ngi la lap ia kawei ka par ba tih dewong beain ba pynkhein ia ki kyndon ain. Haduh 9 ngut ki nongbylla ngi la lap ba ki tih dewiong ha kane ka par” ong u Superintendent of Police Pankaj Rasgania.
U iathuh ba ia kane ka jingkhynra la leh hadien ka jingkhrang ka National Green Tribunal (NGT) ia ka jingtih dewiong beain bad jingkhaii, nalor ka jingbthah ka Iingkashari Meghalaya High Court ban pyntreikam thikna ia ki hukum jong ka.
“U dewiong bala dep tih ba don ha kane ka jaka-bala antad kumba 55 MT-la kurup noh ha ka jingiadonlang u Executive Magistrate hadien ba pyndep ia baroh ki lynti jong ka ain” ula bynrap.
Ia baroh khyndai ngut ki nongbylla la rah noh sha thanad bad la ujor ejahar pyrshah ia ki bad ia u trai par.
“Ka jingtohkit shuh shuh ia kane ka kam kala iaid shakhmat ban ithuh bad leh eiei pyrshah ia ki briew kiba donkti ban bei tyngka bad pyntrei ia kane ka par dewiong” ong u Rasgania.
“Ki Pulit ka East Jaintia Hills kila kut jingmut ban pyntreikam thikna ia ki ain bad hukum, bad kin ym ailad ia kano kano ka kynja tih par beain” ula ong.
