Tura, Nohprah 09 : Ka kynhun rwai Vengaboys kala pynlyng-uh hi pum da ki jingrwai ba pawnam ka kynhun, ha ka Me’gong Festival ha Jengal, West Garo Hills hynnin ka miet sngi Saitjain, kiba la pynkyr-iuh ia ki nongleit tamasa ban iashad khlem jingpyrwa.
Ka Me’gong Festival kala sakhi ia ka jingpoi ki nongleit tamasa sha palat 2 lak ngut, kiba la wan na kylleng ki Shnong ka Ri-lum Garo, na Ri-lum Khasi bad ki Jylla ba marjan, kiba la pynlong ruh ia kane ka tamasa kum ka tamasa ba hehduh hapoh ka Jylla.
Ka West Garo Hills kala khapngiah smam kat shaba leit hynnin ka sngi namar ka jingwan tuid ki paidbah bad ki kali na kylleng ki jaka.
Ka surok na Tura sha Jengjal kala sakhi ia ka jingdheng kali kaba shyrkhei bha naduh ka por 5:30 baje janmiet bad kane ka jingdheng kali kala neh baroh shimiet tad haduh hynne ka step por 8 baje eiei.
Kane ka kynhun rwai na Netherland ba kynthup ia u Captain Kim (Kim Sasabone), Partygirl D’nice (Denise Post-Van Rijswijk), Cowboy Donny (Donny Latupeirissa), bad Sailorboy Robin (Robin Pors), kala kiew ha rynsan ban ai ia ka concert kaba kynsai tam ha kane ka tamasa kaba la wan iashimbynta naduh ki tynmen haduh ki samla bad khynnah.
Wat hapdeng ka jingpoi palat 2 lak ngut, ki nongleit tamasa ki khlem iakhih bad sakma satia na madan ha shilynter ka por ba dang rwai ka kynhun Vengaboys, kaba la pynlong ruh ia kane ka tamasa kum ka tamasa shad kaba hehduh.
Ki jingrwai ka Vengaboys, kiba la pynshongshit eh ia u paidbah ki kynthup ia ka ‘We Like to Party”, “Boom Boom Boom” bad “We’re Going to Ibiza”.
Haba pynpaw ia ka jingsngew ieid ia ka India, ka Captain Kim ula ong “Ngi la wan la hynriew sien sha India bad ki paidbah ha ka Me’gong ki dei ki bym shym poi pyrkhat satia. Ngi kwah ban Party, bad ngi kwah ban party ha Me’gong”. Kane ka Kynhun kala pynbna syndon ia ka India kum ka Ri lajong kaba ar, haba pynpaw ia ka jingsngew jan bad ki don bad kane ka Ri.
Haba iakren bad u Myntri Rangbah ka Jylla Conrad K Sangma, u Captain Kim ula pynpaw ia ka jingsngewnguh ka kynhun ia ka ri India da kaba ong “Ka India ka dei kaba kyrpang eh ia ngi. Ka concert ba nyngkong eh jong ngi ha India kala wanrah ia ka jingkylla ha ka rukom iohi ia ngi kum ka kynhun. Ka India ngi sngew kum ka Ri lajong kaba ar”.
Hashuwa ka Me’gong, ka kynhun Vengaboys kala leit iuhkjat ruh ha Kamakhya Temple kaba don ha Guwahati, Assam.
Ka Partygirl D’nice kala pynpaw ia ka jinglyngnoh ia ka jingdon bun jaidbynriew ka North East bad ong “Ha ka por ba ki khot ia ngi sha ka Me’gong, nga kum pyrkhat ba shano kane ka tamasa ka long bad ynda nga la wad ha google, nga shem ba ka bynta ka dang tip thymmai jong ka Ri India”.
