Shillong, K’lyngkot 16 : U Myntri Rangbah ka Jylla Conrad K Sangma ula khein kam kai ia ki jingkynnoh ba don ka jingpyn iaid bakla ia ka pisa tyngka, haba pyntip ba ka Sorkar Jyllakala pynlut haduh T.23,496 klur haduh u Nohprah, kaba dei ka jingpynlut ba hehduh ha une u snem mang tyngka.
“Ka jingpynlut jong ngi baroh lang naduh u 2017 ka kot T.10,000 klur, kane ka dei ka jingpynlut ba shisha, ym ka mang tyngka. Mynta u snem, tad haduh u Nohprah, ngi la pynlut haduh T.23,496 klur. Tang ha u Nohprah marwei, ngi la pynlut jan kot T.2000 klur, kaba kynthup ia arbnai ka tulop ki nongtrei bad ki bill jong ki tnad bapher bapher” ong u Conrad haba jubab ia ka jingkynnoh ba dang shen da u Nongialam ka Liang Pyrshah Mukul Sangma.
U Myntri Rangbah ula ainam ia kane ka jinglah pyndonkam bha ia ka pisa sha ka jingpynkylla ha ka rukom treikam bad ka jingpyndonkam ia ki technology.
“Ngi la leh shibun ki jingpynkylla ha ka rukom treikam, ka jingpyndonkam ia ki technology, bad shibun ki kam lah lem ha kata ka rukom ba kan ym pynkhia kam than ia ngi ha ka 20 tarik u Nohprah lane ha ka 28 tarik u Lber” ula ong.
U Conrad ula ai nuksa ia ka online system kaba pynlah ia ki Ophisar ban pynkhuid ia ki jingtyrwa bad siew ia ki pisa ba dei ban siew da kaba ong “Wat lada ki Ophis ki don sha kawei pat ka jaka kyndong jong ka pyrthei, um donkam ban hap da wan hi dalade na ka bynta ban ai jingmynjur ia ki jingtyrwa. Ki lah ban shu leh online nangno nangno ruh”.
Ula kular ba ka Sorkar kala treikam da ka jingstad ban lah pyndap ia ki jingpynlut bad ka da leh ha ka rukom kaba dei. “ Ngi la pynlut daka jingstad bad ka jingpynlut ba heh duh ha ka histori ka Jylla kala jia ha une u snem mang tyngka ba mynta. Ngi la kot jan T.24,000 klur, tad haduh u Nohprah”.
U Myntri Rangbah ula kyntait ruh ia ki jingkam ba ki rai jong ka Sorkar ban khang ia ka Ophis naduh ka 19 tarik Nohprah ka dei namar ka jingbym don pisa.
“Kam don jingiadei satia ka jingkhang ophis naduh ka 19 tarik Nohprah bad ka jingbym don pisa. Ka pisa ka dei beit ka jingeh, hynrei ngi lah trei ia ki kam ban pynthikna ba ngin lah pyndap ia ki jingpynlut jong ngi ha ka rukom kaba biang kat kaba lah” ula ong.
