Shillong, Lber 04: Ka sorkar jylla kala pynlut palat T.123,26,70,213 na ka bynta ban thied ia ka jaka haduh mynta, ban shna ia ka Shillong Airport.
Ia kane la pyntip da u Symbud Myntri Rangbah ba khmih ia ka tnad Transport Bah Sniawbhalang Dhar ha ka jubab hapoh ka ka iing dorbar hynne ka sngi Baar.
Ka Shillong Airport kumba long mynta ka don ia ka Runway kaba jrong 1,829 meter, kaba biang na ka bynta ki liengsuin ATR-72 bad Q-400.
Kane ka kad liengsuin ia mynta ka dang pynkamai ia ki liengsuin ban pyniasoh bad ka Delhi, Kolkata, Imphal, Pasighat bad Lengpui.
Ka jingdon jong ka jaka ha Airport ka long 416.16 akar bad ka jaka na ka bynta ka ‘Funnel’ ka long 45.57 akar bad haba kyllum lang baroh ka jaka ka long 461.73 akar.
U Bah Dhar ula pyntip ba la thied 192 akar ka jaka hashwa u snem 1972, 192.16 akar ka jaka la thied ha ka 26 tarik u Naiwieng 2010, la ioh 32 akar ka jaka jong ka Defence ha ka 25 tarik u Nailur, 2017.
Ka jingthied ia ka jaka la leh na ka bynta ka Approach Funnel Cluster II & III (Phase-I & Phase-II) ha u 2018 ha kaba 22.81 akar ka jaka la thied na ka bynta ka Phase I bad 21.37 akar ka jaka la thed na ka bynta ka Phase II.
Nalor kane, sa ka jaka kaba 1.39 akar la thied ha u snem 2020 na ka bynta ka Approach Funnel jong ka Cluster II & III.
La ia bujli ruh ia ka jaka kaba 32 akar kaba la shim na ki shipai na ka bynta ban tei pynheh ia ka airport lyngba ka Land-Swap Deal.
“461.73 akar kadei ka jaka kaba la shim da ka sorkar na ka bynta katei ka Airport haduh mynta” ula ong.
