Nongpoh, Lber 04: Lai ngut ki briew ki la mynsaw, ha ka jingiatakhuh kali hapdeng ka Tata Sumo bad ka Maruti 800, kaba jia hynne ka janmiet sngi Ba-ar ha surok Shillong bypass.
Kane ka jingjia kala jia hajan ka shnong Umroi Nongrah ha ka por 4 baje janmiet.
Kat kum ka jingiathuh ki Pulit, kine ki kali ba iatakhuh ki dei ka Sumo ML06-A-8396 kaba dang leit sha Bhoirymbong bad ka maruti taxi ML05-L-1483 kaba dang mih na Bhoirymbong.
Ki briew kiba shong ha Tata Sumo ki iathuh ba u nongniah ka Sumo ula ialeh katba lah ban kiar na ka jingiatakhuh bad katei ka maruti hynrei namar ka jingkynnoh pynher sted jong kane ka maruti, um shym la lah shuh ban kiar.
La iathuh ba lai ngut ki briew kiba shong ha kane ka maruti kila mynsaw bad la pynkit mar mar ia ki sha Bhoirymbong CHC ban ioh ai jingsumar. Ki Pulit ka Khapmara PIC ki dang pynlong ia ka jingtohkit halor kane ka jingjia.
