Shillong, Nailur 27 : U Myntri Rangbah ka Jylla Conrad K Sangma hynne ka sngi ba-ar, ula pyntip ba ka Sorkar Jylla kala pynlut ia palat 15% na ka mang tyngka jong ka Tnad Pule Puthi manla u snem, ban kyntiew ia ka Higher Education ha ki jaka nongkyndong.
U Myntri Rangbah ula pyntip ia kane haba kren ha ka jingialang jong ki Nonghikai bad ki samla pule bala pynlong ban rakhe ia ka jubili rupa jong ka Mawsynram Border Area College, ha Mawsynram, East Khasi Hills.
Ula ong ba ka Sorkar Jylla wat hapdeng shibun ki jingtynjuh ha ka kam pule dangle, kala kut jingmut ban pynjanai ia ka jinglong jingman ka pule dangle hapoh ka Jylla.
“Ka pule dangle ka dei ka kam ia kaba ka Sorkar, ka hap ban pynleit jingmut bha. Ka dei kawei na ki kam kiba jur bha ka jingtynjuh. Kam dei kaba suk ia ka Sorkar ban pyrshang bad pynbeit ia baroh ki jingeh tang ha ka por ba lyngkot. Hhnrei ngi la shim ia kane kum ka jingialeh bad ngi la pyrshang ban pynjanai ia ka pule dangle lyngba ki kam bapher bapher la ka dei ka Education Policy, ka jingkynshew ka sorkar ha ki iingskul, ka jingplie ia ki People’s College, ne ki jingkyrshan ba ngi ai ban pynbha ia ki Iingskul wat sha ki skul shimet bad ki College” ula ong.
“Na ka T. 16000 klur ka mang tyngka ba ka Sorkar Jylla ka pynlut manla u snem, palat ia ka T. 2500 klur la pynlut ha ka ban pyniaid ia ki skul bapher bapher, ki college bad nalor kata, ka jingkynshew ban pynbha ia ki jingtei ba manla u snem” ong u Myntri Rangbah.
U Myntri Rangbah ula ong ruh ba katba ka Sorkar Jylla ka dang pynleit jingmut ha kine ki jingpyrshang baroh, baroh ki kynhun ba iadon bynta ha ka pule dangle ki don ia kajuh ka jingkitkhlieh ban peit ba ka pule ka dangle kan nang kham janai ha ka Jylla.
“Ngi don bun ki kynhun ba iadon bynta ha ka pule ka dangle. Ngi don ka Sorkar ba kynthup ia ki Nongialam Sain pyrthei bad ki Ophisar, ngi don ki Nonghikai,ngi don ka Imlang sahlang, ngi don ki Kmie Kpa kaba ki Khun ki Kti ki pynlut bun eh ka por ha Iing. Baroh ki dei ki kynhun ki don iala ka jong ka kamram ban pynbha ia ka kam pule dangle” ula ong.
U Myntri Rangbah ula ong ruh ba ka Sorkar Jylla ka dang wad ia ki lad ki lynti kat kiba don ban pynkhlain ia ka Higher Education ha ki jaka nongkyndong lyngba ki kam bapher bapher da kaba thaw ia ki Jingtei ba thymmai bad kiwei kiwei.
“Lada ngi peit sha ki College, phin sa iohi ia bun tylli na ki ki don ha Shillong lane Tura bad kiwei ki District Head Quarter. Namar kata, ki samla ba im ha ki jaka nongkyndong ki kham duna ka lad ban ioh rung pule ha ki kyrdan ba shajrong namar ka jingbym don ki jaka pule ha ki jaka nongkyndong. Ka Sorkar kala treikam khlem shongthait ban pynkylla ia kane bad ban pynthikna ba ki samla jong ngi kin ym don ia ka lad ban ioh pule ia ki kyrdan ba hajrong” ong u Myntri Rangbah.
Ha kane ka jingialang, u Myntri Rangbah ka Jylla ha ryngkat u MP ka Rajya Sabha Dr WR Kharlukhi, Myntri kam pule puthi ma Lahkmen Rymbui bad kiwei kiwei, kila plie ia u mot sahnam jong u Bah Shrolendon Marbaniang, u Nongseng jong ka Mawsynram Border Area College bad pyllait ruh ia ka souvenir jong ka Jubuli Rupa ka College.
Today we unveiled the bust of Shri Shrolenson Marbaniang, the founding father of the College.
Bah Shro was a farsighted leader who was sensitive to the needs of the people in the border area. MBAC will remain one of his greatest legacies. pic.twitter.com/SlQfVIfh7T
— Conrad Sangma (@SangmaConrad) September 27, 2022
