Resubelpara, July 29: U Myntri Rangbah ka jylla Conrad K. Sangma ula pynpaw ba ka bor jong ka jingkyntiew ia ka roi ka par kan shong eh ha ka jingpynkup bor ia ki paidbah lyngba ka jingiashimbynta jong ki shnong ki thaw haba pynbun ia ki jingtei, ka jingpynkup bor ia ki kynthei bad ia ka jingsengkam ki samla.
“Ngi lah trei da kaba iatreilang bad baroh ki bynta jong ka imlang sahlang ban pynurlong ia ka thong ka jong ngi kata ban kynjoh ia ka ioh ka kot kaba 10-billion-dollar” ong u Myntri Rangbah haba kren ha ka jingplie ia artylli ki jingkieng.
Kine ki ar tylli ki jingkieng, kawei kaba pyniasoh ia ka Chidaret sha ka Thapa Bazar bad kawei pat, kaba don ha shilliang jongka surok Bajengdoba–Resubelpara, kidei kiba la khmih lynti ba kin pynsuk shibun ia ka leit ka wan jong ki hajar ngut ki nongshong shnong.
“Ki jingkieng bad ki surok kim dei tang ki lad ban pyniasoh, ki long ki lad kiba kongsan ban poi sha ki iew ki hat, jaka ai jingsumar bad ha ka pule puthi. Kine ki jingkieng kin pynduna ia ka jingeh, khamtam ha ka por jong ka aiom ba jur slap” ong u Myntri Rangbah.
Haba pynpaw ia ka jingshimkhia jong ka sorkar jylla ha kaba iadei bad ki jingtei bapher bapher, u Conrad ula iathuh ba ha kine ki 7 snem kiba la dep, ka jingbei tyngka ha ka jingshna ia ki surok kala kiew bha bad kala jan kot sha ka T.5,000 Klur, kaba la tam bunshah na kaei kaba ki sorkar kiba rim kila lah ban leh ha ki 20 snem.
Ula pynbna ba ka Myntri Pla Tyngka ka ri India ka Nirmala Sitharaman kala iaroh ia ka kam pynroi ha ka jylla Meghalaya ha kawei ka artikil kaba la ai kyrteng “The Meghalaya Story: Realising Aspirations”, kaba la pynmih ha ka Hindustan Times.
“Kane ka jingai jingithuh jong ka Myntri Pla Tyngka ka ri India kadei ka jingphla ia ka jingshisha halor ka jingiatreilang ka jong ngi ban kiew shaphrang. Ngi dang iai trei shitom shuh shuh ban pynlong ia ka Meghalaya kaba lah ban iakhun iaki jingtynjuh” ong u Conrad Sangma.
“Ha ka jingwan ba 3 sngi ka jongka ha jylla Meghalaya, ka Myntri Pla Tyngka ka ri kala pynlut ia ka por ban iakren bad ki nongrep, ki longkmie bad ki samla na kylleng ki bynta jong ka jylla” ong u Conrad haba bynrap “Kala iohi dala ki khmat ia ka jingshimkhia jong ka sorkar ka jong ngi, kaba la kyrshan ia ki bynta bapher bapher ha ka imlang sahlang, naduh ka kam rep kam riang shaduh ka kam sengkam sengjam bad ka jingpynkup bor ia ki longkmie. Ka Artikil ka jongka kaba kren jam shaphang ka jingiakhun kaba jar jar jong ka Meghalaya bad ka jingkylla kaba dang iaid shakhmat”.
Ha ka jingsngew ka jongka, ka Sitharaman kala pynpaw ia ka Meghalaya kum ka jylla kaba jar jar kaba wanrah pat ia ka jingkylla kaba jur, kaba iaid ryngkat bad ka jingroi jong ki jingtei bad ka roi ka par ha ki shnong ki thaw. Kala iaroh ruh ia ki sienjam ban pynkhlain ia ki lad ban pyniasoh da ki surok, ban pynkup bor ia ki Self-Help Group (SHG), jingkyntiew ia ki jingtei kiba iadei bad ka kam jngohkai bad ka jingpyniar ia ka kam khaii pateng ha ka rep ka riang lyngba ka prokram kum ka Megha-LAMP.
Ka Myntri Pla Tyngka kala pynkynmaw ruh ia ka jingleit jngoh ia ki SHG kiba pynmih ia u shynrai ba khlem pyndonkam dawai, ki ashar bad ki mar kiba la shu thain da ki kti bad ka jingiakynduh ia ki nongrep kiba shalan ia ki sohtrun sha Dubai — ka nuksa jong ka bor jong ka jingsengkam bad ban pynwandur thymmai ia ka ioh ka kot ha ki shnong ki thaw.
