Shillong, Nailur 22 : Ka Sorkar Meghalaya kala pynlut palat T. 22.56 klur ka pisa ha kaba thung ia ki 124 ngut ki Consultant na ka bynta ki Tnad treikam bapher bapher ka Jylla.
Haba jubab ia ka jingkylli bala wanrah da ka MLA ka AITC na Ampati Miani D Shira ha Iingdorbar, u Myntri Rangbah Conrad k Sangma ula ong ba ki Consultant ki dei kiba la thung na ka bynta ki project bala bei tyngka na shabar kiba don haduh 59 tylli.
Ula ong ba kine ki Consultant ki dei ki Technical Expert, kiba la wanrah ha ka jingtreikam kat kum ki kam ba ki dei ban leh. La wanrah ia ki tang na ka bynta ki Central Sponsored Scheme (CSS) ne ki skhim ba wan na ka Sorkar Pdeng bad ki project ba bei tyngka na shabar ka Ri (EAP).
Ha baroh kine ki kam, ka jingthung Consultant ka dei kaba la buh hapoh ki kyndon treikam ne Guidelines.
Ula ong ba ki don ki khep ha kaba ki Consultant la buh lang ha ka ban pyndonkam hapoh ki Tnad bapher bapher.
Haba ai nuksa ia ka Unity Mall Project kum ka nuksa, u Myntri Rangbah ula ong ba haduh T. 130 klur la mang na ka bynta ka Meghalaya.
“Ngi dei tang 3 tylli ki Jylla hapoh ka Ri kaba ngi la lah ban leh ia kane tang hapoh 6 bnai. Kane baroh ka urlong namar ba ngi don ia ki stad ban ai jingmut” ula ong bad bynrap “Ka Sorkar India bad ka EAP kala buh kyndon ba dei ban thung iaki Consultant kiba la tbit bha ha ka lain Technical”.
Ula ong ba ka jingsiew ia kine ki Consultant ka dei kaba la pynrung lang ha ka mang tyngka jong ka Project ym ba ka Sorkar Jylla kan hap ban sei na ka pla ban siew ia ki.
Nalor kane, u Myntri Rangbah ula ong ba ki trai shnong kila ioh jingmyntoi bha namar kila ioh ia ka lad ban iatrei bad ioh jinghikai ha kine ki Consultant.
