Pynlur surok ka KSU ha Shnong Umsaw Lum Dorbar kum ka jingai sngewbha Khristmas

Shillong, Nohprah 25 : Ka Khasi Students’ Union (KSU)-Raid Nongtung Circle ha ka 24 tarik Nohprah, kala hiar pynlur ia ka surok ba lah ban iaid kali ha ka shnong Umsaw Lum Dorbar, kum ka jingai sngewbha Khristmas ia ka Shnong.

Kane ka shnong ka dei kaba don ha khappud ka Jylla Meghalaya bad Assam. Ki nongshongshnong kane ka shnong kila mad shibun ki jingeh namar ka jingbym don ia ka surok kaba paka.

Haba ioh pdiang ia ki jingud ia ka jingbym leh eiei ka Sorkar ban pynpoi surok, ka KSU Raid Nongtung Circle kala wanrah ia ka puh shilum (JCB) ban pom surok ia u lum bad pynlur ia ka lynti iaid ka surok kaban lah iaid ki kali haduh ha shnong.

“Ngi la shim ia kane ka sienjam kum shibynta na ki jinglehbha Khristmas, ban pynthikna ba ki nong shongshnonng ka Umsaw Lum Dorbar ki ioh ia ki jingtrei kiba donkam bad ba dei hok ban ioh. Ka jingbym don ka surok ka dei ka jingeh kaba la slem bad ngi la rai ban leh eiei halor kane ka kam” ong ka KSU.

Ki Nongshongshong kila pynpaw ia ka jingsngewnguh halor kane ka jingiarap ka KSU, haba pynpaw ba kane ka jingshna surok kan iarap bha ha ka leit ka wan, ka kit ka bah bad kyntiew ia ka kamai kajih jong ki nongshongshnong.

Dang shen, ki nongshongshnong ka Umsaw Lum Dorbar kala pynsngew ia kane ka jingeh hakhmat u President Rangbah barim ka KSU uba long mynta u Chairman ka NESO Bah Samuel B Jyrwa, uba la leit jngoh ia ka eka shnong ha ka 16 tarik mynta u bnai.

Ka KSU ka pynkynmaw ba ki paradoh parasnam jong kane ka shong ki dei kiba la mad ia ka jingshah thombor ha ka Tnad Forest ka Assam ha u snem 2005, kaba la thang haduh 30 tylli ki Iing.

Ka KSU hapoh ka jingialam u Bah Samuel B Jyrwa kum u President ha katei ka por ryngkat u General Secretary barim Bah Hamlet Dohlong bad u Maieid Hopingstone Lyngdoh, kila hiar leit jngoh ia kane ka jingjia bad kila ai jingiarap bad jingiada ia ki paradoh parasnam na ki bor ka Sorkar Assam.