Shillong, Kyllalyngkot 12: Kum shi bynta jong ka jingpynkhreh ban wan ka President ka ri Droupadi Murmu, ka Tnad Pynlip ding hynne ka sngi Thohdieng, kala pynlong ia ka Mock Drill ha Raj Bhavan Shillong, ia kaba la wan ban iashimbynta da ki ophisar bad ki pulit ka jylla.
Ia kane ka Mock Drill la pynlong hapoh ka jingpeit jingkhmih jong u Lat ka jylla u Phagu Chauhan, uba la khmih hi dalade ba kane ka Mock Drill kadei ban long kaba iaid beit iaid ryntih.
Ki pulit jong ka Meghalaya Fire Service, kila pyndonkam iala ka buit ka sap bad ia ki tiar katkum ka juk kaba mynta ha kaban ialeh ban pynlip iaka ding, ban pynlait im ia ki lanot bad ban ai jingsumar kaba mardor.
Nalor kane, kila ai jingbatai bad jinghikai ruh ia ki nongtrei hapoh Raj Bhavan kumno ban leh lada jia ba ka don ka jingpluh ding bad kumno ban pyndonkam ia ki tiar ki tar kiba lah ban long kiba kordor haba mih kano kano ka jingpluh kaba kynthup ruh ban peit bad khmih bniah ia ki waïar ding kiba lah ban lait, ki tiar pynlip ding bad kiwei kiwei.
