Shillong, Kyllalyngkot 12: Ki nongialehkai Football Kynthei jong ka East Khasi Hills kila pynrem kput iaka kynhun jong ka South West Garo Hills da 13-0 kol ha ka jingiakhun ha ka U-18 Girls’ Football jong ka 5th Meghalaya Games 2024 kaba la long hynne ka sngi Thohdieng.
Naduh kaba sdang ka East Khasi Hills kala pyni iala ka jingtbit ha kaba kala thep 9 kol ha ka kylla step pyrshah ia ka South West Garo Hills kiba la shem jingeh ban ioh pynphai tang shi kol ruh.
Kane ka jinglehkai bha ki kynthei ka East Khasi Hills kala bteng haka kylla miet ruh bad kila thep biang sa 4 kol bad watla ki nongialehkai ka South West Garo Hills kila iakhun dohiap ban ioh thep kol hynrei kim shym la lah ban pynkhih ia ka jar namar ka jingskhem jong ki nongap bak ka East Khasi Hills.
Ha kaba kut, ka East Khasi Hills District kala pynliem kput ia ka South West Garo Hills da 13-0 kol.
Da kane ka jingjop ka East Khasi Hills kan jam sha kawei pat ka Round namar ba ha katei ka Group ki don tang ar tylli ki kynhun ialehkai.
