Shillong, Naiwieng 19: Da kaba shim ia ka sienjam na ka bynta ka bit ka biang jong ki khynnah pule, ka NESFAS ryngkat bad ka Directorate of School Education and Literacy (DSEL), ha ka sngi Baar, kila pynlong ia ka School Meal Programme ha Laitsohpliah Community Hall.
Ha kane ka jingialang la wan ban iashimbynta da ki nongialam shnong, ki nonghikai, ki kmie ki kpa bad ki riewshemphang.
Hashwa ban pynlong ia katei ka prokram, ki nongiashimbynta kila leit jurip ia ka kper skul jong ka Laitsohpliah bad Subakalai ban peit ia ka jinglong jingman jong ki kper skul kiba mih ki soh ki pai bad ki jingbam kiba tei.
La sdang iaka prokram da ka jingioh ia ki kyntien pdiang sngewbha na u Bah W Marwein, Rangbah Shnong ka Laitsohpliah, katba u Bah Pius Ranee, Executive Director ka NESFAS, ula ai ia ka jingbatai kaba bniah halor ka jinglong kongsan ban pynmih ia ka bam ka dih .
Ula ong, “Ki khynnah ki don bha iaki jingtip halor ki jingim bad ki jingthaw ki bapher bapher namar ki nonghikai kiba kum u Babu Nestar uba don ia ki buit treikam bad ia ki jingai jinghikai ha kaba iadei bad ka rep ka riang tynrai”.
Ula ong ba kane ka prokram ka long kaba kongsan namar la buh hakhmat eh ia ka shnong ka thaw bad ki don iaka bynta kaba khraw bha. Ka don ka thong ha ka pyrthei ban pynbiang ia ki bam kiba tei sha ki khynnah skul hapoh jong u snem 2030 bad ula pynshlur ia baroh ba buh ia katei ka thong khnang bay n lah ban pynurlong ia kajingbuh thong bad ka Meghalaya ka lah ban ialam da kaba iatreilang bad ki riewrangbah bad baroh kiba don bynta lang ban lah ban long kaba seisoh.
U Swapnil Tembe, Director ka DSEL, ula ai khublei ia ka NESFAS bad ia ki nonghikai skul halor ka jingshimkhia ka jongki ban kyntiew ia ka rukom ai bam ha ki skul bad ka banjur ba ka sorkar ka iengskhem ha kaban kyrshan ia kum kitei ki sienjam bad ka ong ba ki ki kper skul kiba mih ia ki jingthung kiba bha ka long ka atiar kaba kongsan bha kaba ki skul kidei ban don.
“Kane ka jingiatreilang ka long kaba kongsan bha na ka bynta ban pyniaid shakhmat bad ban ioh ia ka jingseisoh kaba shi rta. Nga ngeit skhem bad a ka jingpyniar ia kine ki sienjam bad ban kynthup ia ki jingbam kiba tei bad kumta ngin lah ban kyntiew ia ka koit ka khiah lyngba ki jingbam jingdih kiba tei ia ki khynnah skul bad ban shimkhia haor ka jingbym biang ia ka rukom bam ia ki jingbam kiba tei bad ia ka Anemia. To ngin ia buh hakhmat ia ki jingbam tynrai kiba tei bad ban pynkup bor ia ki pateng ban dang wan ban long kiba don ia ka jingkitkhlieh ha kaban pyndonkam bad ban pynmih ia ki jingbam” la ong u Tembe.
La pynkut a katei ka prokram da kaba ia bam ja lang hapoh ka skul, ha kaba la pynia ia ki jingbam kiba tei kiba la shet bad pynkhreh da kaba pyndonkam da ki jingbam tynrai kiba la ioh hi na katei ka jaka.
, ha ka sngi Baar, kila pynlong ia ka School Meal Programme ha Laitsohpliah Community Hall.){kind=link}