Shillong, Jymmang 23 : Ka Sorkar Jylla kala pynlong kongsan ia ka Tribe Certificate na ka bynta ki jaka kiba hap hapoh ka Khasi Hills Autonomous District Council (KHADC) ban ai ia ka Scheduled Tribe Certificate ha Jylla.
Kane ka long kat kum ka jingpynkylla (amendment) jong ka Sl7 jong ka kyndon ban pdiang ban pyndep ia ki aplikeshon ban ai Schedule Castes bad Scheduled Tribe Certificate hapoh ka Jylla Meghalaya bala pynmih kat kum ka Office Memorandum ba 19/03/2014.
Haba pyntip ia kane hynne ka sngi Palei, u Myntri ka Tnad Social Welfare ula ong “Kane ka dei halor ki aplikeshon ban ai ST/SC certificate hapoh ka Jylla Meghalaya, nalor kaei kaba la buh ha ka kyndon kaba rim. Ngi la pynrung sa kawei ka kyndon kaba ong : Kawei na ki jingdonkam ba hap banati ka kynthup ia ka Tribe Certificate na ki bor khmih na ka bynta ki jaka ba hap hapoh ka KHADC ba kan long kongsan”.
“Kane kam shym la don baroh shikatta watla ka Tribe certificate ba ai da ka KHADC, ka dei ka kot kaba la ithuh da ka ain. Kumta kino kino kiba kwah pynrung kyrteng ialade lane kam lane kwah banpynrung kyrteng bad ban ai ia ka ST certificate, ki dei ban don shuwa ia ka Tribe certificate bala ai da ka KHADC kat kum ka kyndon bala buh” ula ong.
Kat kum ka jingpynbna bala pynmih halor kane, dei ban pule noh mynta kum ka ‘7. Ki kot ki sla bala buh harum naka bynta kine ki kam ki dei ia kaban hap ailang.
a. Caste identity
i. Caste certificate jong u Kpa/Kmie bad ka sakhi ia ka jingiadei kajuh ka snam.
ii. Ka Copy jong ka pata barim ba pyni ia ka kyrteng ka Jaidbynriew ha kane ka Kot.
iii. Kino kino ki kot ki sla ba ioh na ka Sorkar ban pynshisha ia ka jingdei Scheduled Caste
iv. Ka Tribe certificate na ki bor khmih na ka bynta ki jaka ba hap hapoh ka Khasi Hills Autonomous District Council (KHADC) kan dei kaba kongsan”.
