Shillong, Nohprah 08: Kum shi bynta ban ialeh ban kynjoh sha ka 100% hapoh ka ri ban kyntiew iaka City Gas Distribution (CGD) network, ka Petroleum & Natural Gas Regulatory Board (PNGRB) kala pynlong ia ka Road Show na ka bynta ka 12th CGD Bidding Round. Ia kane la pynlong hynne ka sngi Thohdieng ha Taj Vivanta Hotel, Shillong.
Ia kane ka jingialang la plie da u Symbud Myntri Rangbah ka jylla u Bah Sniawbhalang Dhar, ha ka jingdonlang u Dr. Anil Kumar Jain, Chairperson PNGRB, u Additional Chief Secretary ka jylla u Shakil P Ahammed bad kiwei kiwei.
Ka 12th CGD Bidding Round ka thmu ban pynurlong iaka 100% ban pynpoi iaka natural gas ha ka ri baroh kawei da kaba ai iaka 8G Geographical Area kaban kynthup ia ki 6 tylli ki jylla jong ka Thaiñ Shatei Lam Mihgi bad ki Union Territory jong ka Jammu & Kashmir bad Ladakh.
Hadien ba la pyndep iaka 12th CGD bidding round, la jan baroh ki jaka jong ka ri (lait noh ki dewlynnong) kin don hapoh jong ka City Gas Distribution network bad ka thong jong ka PNGRB ka long ban ai ka gas shet jingshet kaba khuid sha man la ki longiing, ban kyrshan ia ki karkhana, ban kit ban bah kaban long ka kam kaba radbah na ka bynta ban pynurlong ia katei ka thong khamtam ha kaban iarap ha kaban pynneh pynsah iaka mariang ha kylleng ki jaka.
U Bah Sniawbhalang Dhar, ula ai ka jingiaroh ia ka rukom treikam jongka PNGRB, lyngba ka sienjam kaba la shim ha ki 11 tylli ki wat kiba la dep bad ula ong ba kane kan iarap shibun ha kaban kyntiew iaka ri India bad ha ka ioh ka kot ha kaba iadei bad ka gas.
Ula ong ba kane ka sienjam kan iarap ban aikam aijam, ban pynbiang iaka gas kaba khuid ba suba ha ryngkat bad ka jingkyrshan bad kyntiew ia ki kam khaii kiba don ha kylleng ki jylla.
Ula ong, ka jingiatreilang bad ka PNGRB ban pynmih iaka Natural Gas ha ka jylla ka long kaba biang bha ban buh ia ki Incubation Centres na ka bynta ki nongsengkam bad ka Skill Development na ka bynta ki samla ka Meghalaya bad ula ai ka jingkular ban don ia ka polisi bad ka jingkyrshan na ki bor sorkar sha baroh kiba don bynta ha katei ka kam.
Katba u Dr. Anil Kumar Jain, ula pynpaw ba ka PNGRB ia mynta hi, ka pynleit jingmut ha kaban pynmih ia ka gas kaba khuid kaba suba ha kylleng ki bynta jong ka ri khamtam ha ka Thaiñ Shatei Lam Mihgi.
Ula Dr. Jain ula kyntu ia ka sorkar jylla ban wanrah ia ki jingkylla ha kaba iadei bad ka jingshim khajna halor ka Natural Gas bad ban pynmih iaka CGD Policy ha ka jylla Meghalaya katkum ka draft policy kaba la pynbiang da ka MoPNG.
Ha katei ka jingialang la ioh ruh ia ka jingkren na u Shakil P. Ahammed, u Suresh P Manglani u CEO jongka Adani Total Gas Limited, u Sanjay Kumar u Director (Marketing), GAIL (India) Limited bad u Ajit Kumar Thakur u CEO, Indradhanush Gas Grid Limited bad kiwei kiwei.
Ia ka Electronic Bid la khot ne sdang naduh ka 13 tarik u Risaw 2023 bad kan kut ha ka 11 tarik u Kyllalyngkot 2023 na ka bynta ki 7 tylli ki GAs hapoh jongka 12th CGD Bidding Round bad ha ka 23 Rymphang 2024 na ka bynta ka Mizoram GA bad ka PNGRB ka thmu ban pyndep iaka jingpynkhamti ia ki kam ha u Rymphang/Lber 2024.
