Shillong, Nohprah 08 : Ka North East Students’ Organisation (NESO) kan rakhe da ka “Black Day’ ne ka “Sngi ba dum Ngit” ha ka 11 tarik Nohprah ha baroh 7 tylli ki Jylla ka thain Shatei Lam Mihngi, ban pyni ia ka dak ka jingpyrshah ia ka Citizenship (Amendment) Act, 2019, kaba dei ka jingleh bym hok pyrshah ia ki paid riewlum trai jylla jong ka thain.
Ha ka kyrwoh bala pyllait hynne ka sngi Thohdieng, u Chairman ka NESO Bah Samuel B Jyrwa ula ong ba ka Seng ka kwah ban pynkynmaw ia ki paidbah jong ka thain Shatei Lam Mihngi ba ha ka 11 tarik u Nohprah, 2019, wat hapdeng ka jingpyrshah ba khlem sangeh jong ki trai Jylla ka thain ia ka Citizenship (Amendment) Bill, 2019, ka Sorkar India kam shym la pynsngap bad khatduh lyngba ka Rajya Sabha kala mynjur ia kane ka Ain Iakjakor bala tip kum ka Citizenship (Amendment) Act, 2019.
U Bah Samuel u pyntip ba ka NESO kala pynbna ba ka 11 tarik u Nohprah kan dei ka sngi ka ban kynmaw kum ka sngi ba ‘dum ngit’ (Black Day) ia ka thain Shatei Lam Mihngi baroh kawei.
“Kumta, kum ka jingbteng ban rakhe ia kane ka Sngi ba Dum Ngit, ka NESO kala rai ba kan wah da ki lama iong bad ki banner iong ha kiba bun ki jaka ba kongsan ha baroh ki hynriew tylli ki Jylla ha ka 11 tarik Nohprah, 2023” ong u Bah Samuel.
“Ka jingrakhe ka long ban phah ia ka khubor sha ka Sorkar India ba ngi pyrshah ia ka Citizenship (Amendment) Act, 2019 bad ha kajuh ka por ban pynkynmaw ia ki paidbah ia ka jingle bym hok jong ka Sorkar India pyrshah ia ki trai Jylla ka thain Shatei Lam Mihngi” ula ong.
U Bah Samuel ula ong ba ka NESO ka khot ia baroh ki paidbah ka thain ba kin kyrshan ia kane ka sien jam bala shim bad ha kajuh ka por ban ieng iakhun beit ia ka jingleh bym hok kaba dei ka hok ba la ai da u Blei.
