Shillong, Jymmang 12: Ka ophis jong ka Deputy Commissioner, East Khasi Hills District, hynne ka sngi Nyngkong kala pynlong ia ka Bike Rally ha Shillong, kum ka dak ban pynpaw ia ka jingsngewnguh bad leh burom ia ki shipai jong ka ri kiba shakri ban iada ia ka Ri.
Ia kane ka sienjam la lamkhmat da ka Deputy Commissioner Kong R.M. Kurbah, da ka jingthmu ban ai ka jingithuh ia ka jinglen lade bad ia ka jingaiti jong ki shipai na ka bynta ka ri.
Kane ka bike rally kala sdang na Golflink, ha kaba u bah Shanborlang Warjri, u Additional Deputy Commissioner ula kaweh ia ka lama bad la pynkut pat ha State Central Library.
Haba ai jingkren ha ka jingialang kaba la long ha Library, ka Kong Kurbah kala pynpaw ba kane ka prokram kadei kum ka dak ban ai jingkyrshan ia ki shipai kiba la donbynta ha ka jingiakynad bad ka ri Pakistan. Kala pynpaw ba ka jingjia kaba dang shen ha Pahalgam kadei ka dak jong ka jingpynkynmaw ia ka jingshlur bad ia ka jingaiti kaba la pyni da ki shipai ka ri bad ka pynpaw ba ka jingshngain bad ka jingsuk kaba ki paidbah ki ioh leh sngewbha kadei namar ka jingaiti jong ki shipai.
“Ka ri ka ieng tylli kawei ha kaban pynpaw ia ka jingsngewnguh. Kadei lyngba ka jingbym thiah bym dem ka jongki ba ngi ioh pat ma ngi ban thiah da kaba suk” kala ong.
Kala iengskhem ruh ha kaban pynpaw ba ka sorkar kan ai ia ka jingkyrshan kaba pura bad kala ong, ba watla ki shipai kila don ha kano kano ka jaka ruh kim shym la shah ieh marwei.
“Ngi kum ki paidbah jong ka ri India, ngi don ryngkat lang bad ki, ngin ieng tylli lang bad ki” kala ong.
Ka Kong Kurbah kala pynkut da kaba pynpaw ia ka jingkyrmen ba kan mih kaei kaei kaba bha bad ka pynpaw ia ka jingskhem jingmut halor ka jingjop jong ki shipai jongka Ri.
