Shillong, Nailur 8: Ka NEIGRIHMS hynne ka sngi, kala pynlong ia ka East Zone Pediatric Nephrology Conference 2024 lyngba ka Department of Paediatrics, da kaba buh ia ka thong ban ai ka jingshakri katkum kane ka juk stad kaba mynta.
Hapoh ka jingïalam jongu Dr. Himesh Barman, Professor bad u Head jong ka Department ryngkat bad ka kynhun jong u kaba kynthup ïa ka Dr. Rosina Ksoo, Associate Professor, and Dr. Mampy Das, Assistant Professor, kila wanrah lang ia bun ngut ki stad bad ki riewshemphang kiba la ai jingkren halor ki mat kiba kongsan kiba iadei bad ka jingpang Nephrotic Syndrome, Glomerulonephritis bad Urinary Tract Infections (UTI).
La plie ia kane ka conference da u Prof. (Dr) C. Daniala, Medical Superintendent ka NEIGRIHMS, uba la banjur ïa ka jingdonkam kyrkieh ïa ka Pediatric Nephrology Unit kaba kyrpang ha katei ka jaka sumar, da ka jingiohi jngai ban sdang noh ïa ka DM Residency Program ha ka Pediatric Nephrology ha ki snem 2019, kaba pyni ia ka jingaiti jong ka NEIGRIHMS ban pyniar ia ka jinghikai bad jingai jingsumar ha ka thain.
U Dr. Anil Vasudevan na ka St. John’s Medical College, Bangalore bad Dr. Valentine Lobo na KEM Hospital, Pune, kila ai ka jingbatai kaba bniah halor ka jingkylla ka por ha katei ka liang, kynthup ia ki Medical Geneticsbad kilapynpaw ruh ha kaba iadeibad ki jinglap kiba thymmai bad ka jingktah ka jongki ha ka rukom ban ai jingsumar.
Ki nongïashimbynta ki kynthup ruh ïa ki nonghikai jongka Pediatric Nephrology na ki jylla bapher bapher jong ka Ri India Mihngi, kum na ka West Bengal, Meghalaya, Assam, Orissa, Bihar, Jharkhand, Mizoram, bad Arunachal Pradesh.
Kala don ruh ka jingiashimbynta shit rhem jong ki nongiahsimbynta ha ka jingiakob kyntip, ka jingai ia ki jingthoh bad ka poster session.
