Shillong, Jylliew 12 : Ka National Commission of Protection of Child Rights (NCPCR) ha ryngkat ka jingiatreilang bad ka State Commission for Protection of Child Rights (SCPCR) lem bad ki bor District ka East Jaintia Hills, hynne ka sngi Balang, kila pynlong ia ka jingialap ban tehlakam bad iakhun pyrshah ia ki kam khaii Khynnah ha East Jaintia Hills.
Ia kane ka prokram la pynlong ha Conference Hall jong ka Deputy Commissioner ka East Jaintia Hills, Khliehriat.
Ha kane ka prokram la wan ban iakshimbynta da ka Additional Deputy Commissioner ka East Jaintia Hills District, kong J.U Kharpuri, nalor u Assistant Commissioner F. Wann, ki Heh Pulit, ki Ophisar ka Social Welfare, Health Education bad Labour Department, ki dkhotk Child Welfare Committee, ki Khlieh Nongsynshar Shnong, ki Principal jong ki skul bad kiwei kiwei.
Ka Kong J.U Kharpuri kala ban jur ia ka jinglong kongsan ban leh eiei halor ka kam khaii khynnah. Kala khot ia ka jingiatrei lang jong baroh ki kynhun kynthup ki briew ka ain, ki Ophisar, ki Nongialam Shnong, ki jaka pule ba kin tehlakam bad iakhun pyrshah ia kane ka kam bymman.
Ka kong Opaia Tyngkan kala ai jingkren halor ki hok bapher bapher jong ki Khynnah kat kum ka Riti Synshar ka Ri India. Kala kren ruh halor ka Protection of Children from Sexual Offences (POCSO) Act, 2012, the Prohibition of Child Marriage Act, 2006, the Child Labour (Prohibition and Regulation) Act, 1986, bad ka Juvenile Justice (Care and Protection of Children) Act, 2015.
