Nongpoh, Nailur 19: Ka Ministry of Textile ka Sorkar India ha ryngkat ka National Institute of Fashion Technology (NIFT) kala pynlong ia ka National Sizing Survey ban don ia ka jingthew ba thikna ia ka jingheh ki met briew bad ki kjat lyngba ki jain phong ne juti (body size chart) jong ki Nongshongshnong ka Ri India baroh kawei.
Ka MoT bad ka NIFT kila sdang ia kane ka prokram ban lum jingkhein ia ka body size chart jong ki 25 hajar ngut ki briew ha kylleng ki Jylla ka Ri India.
Ka Ministry of Textiles ha ryngkat ka NIFT hadien ba ka la pyndep ïa ki survey ban thew ïa ki met briew ha Mumbai, Calcutta, Chennai bad kiwei kiwei, ka la phaikhmat pat sa ha ka thaiñ Lam Shatei Mihngi, ha kaba ka la jied ïa ka Nongbah Shillong ban pynlong ïa kane ka survey.
Ia kane ka survey la pynlong ha Union Christian College (UCC) ha kaba yn pdiang kumba 800 ngut ki briew ban shimbynta ha kane ka prokram.
Na ka liang u Bah Damon Lyndem kum u wei u dkhot ka NIFT u la ïathuh, ba kane ka jingthmu jong ka Ministry of Textiles ban shim ïa ki jingthew ïa ki met briew hapoh ka Ri India hi ka long ban ïoh ïa ka jingthew kiba biang haba pynmih ïa kino kino ki mar phong kum ki jaiñ ki juti bad kumta terter namar baroh shikatta, ki nong India haba ki thied jingthied kum ki jaiñ phong ne juti ki hap ban pynïahap ïa ka jingthew kaba na United Kingdom lane ki UK Size.
U la ïathuh ruh, ba haduh mynta ba la sdang ïa kane ka programme ha UCC la sakhi ïa ka jinglong kaba kloi jong ki paidbah nongshong shnong kiba la wan ban shimbynta bad u la pynpaw ruh ba hashwa ba kut u ne u bnai yn lah ban kot sha ka thong ban ïoh 800 ngut ki nongïashimbynta kumba angnud da ka tnad Textile bad ka NIFT.
