Shillong, Rymphang 03: Da ka jingthmu ban kyntiew ia ka Jylla Meghalaya sha ka kyrdan kaban don ha ka map jong ka khaii pateng ha ka pyrthei, ka Jylla hynne ka Sngi Baar kala pynlong ha ka sien kaba nyngkong eh ha ka thain shatei lammihngi ka ri, ia ka Reverse Buyer–Seller Meet (RBSM), da kaba wanrah ia ki 28 tylli ki kynhun kiba na ki 16 tylli ki ri ban iakynduh markhmat bad palat 100 tylli ki MSME ne karkhana rit jong ka jylla.
La pynlong ia kane da ka Department of Commerce and Industries ryngkat ka jingiatreilang bad ka Federation of Indian Export Organisations (FIEO) hapoh jongka Centre’s RAMP Scheme, ha kane ka jingialang ka baar sngi ha State Convention Centre kadei da ka thong ban pynkhlain ia ka khaii pateng bad ban pynisoh ia ki karkhana rit ne MSME sha ki rynsan jong ka pyrthei.
U Myntri Rangbah u Conrad K. Sangma, haba ai jingkren ha ka jingplie ia kane ka jingialang, ula pynpaw ba ka long ka khyllipmat kaba sngewsarong ym tang ia ka Meghalaya hynrei ia ka thain shatei lamihngi hi baroh kawei. Ula banjur ba kum kine ki sienjam kidei kiba pynmih ia kiba bun ki sienjam bad ka jingiatreilang kaba neh slem ha ka jaka ba kan shu long tang kum ka dak jong ka jingiadonlang.
“Kam don kano kano ruh kaban lah ban kylla tang ha ka shi miet” ula ong bad ka kdew ia ka jingdonkam ban shim ia ki sienjam kiba lah ban bteng ia ka jingshimkhia bad jingskhem jingmut.
Ula pynpaw ba ka Meghalaya Livelihoods and Access to Markets Programme kaba la kyrshan da ka IFAD, ba kumno kane ka projek kala wanrah ia ka jingkylla na kaban khang khyrdep sha ka sienjam kaba ka IFAD kala ioh ia ka jingithuh ha kylleng ki ri.
U Sangma ula ong, ka Meghalaya kala pynduh noh ia palat 400 ki jingteh pyrkhing kaba kynthup ia kaba la jan kot sha ki 70 tylli kiba dei ki kyndon kiba iadei bad ka kam bylla bad la wanrah ia ka Unified Investor Portal ban pyniaid ryntih ia ki kam ban ai jingbit ne Clearance.
Ula kdew ruh halor ka jingshalan shabar ri kum u Sohtrun uba la ioh ia ka syrnod ban shalan shabar ka ri da ki jhad bad ka jingpynwandur ia ki musli musla da ki Self-Help Group kiba la pyniaid da ki longkmie.
Ha kane ka jingialang u Myntri Rangbah ula pyllait ruh ia ka shap jongka MeghaRise bad ia ka State-Level MSME Portal da ka jingthmu ban pynkhlain ia ka nam, ban pynbha ia ka jingiohi ha ki iew ki hat bad ban pynsuk ia ka jingioh ia ki lad Digital ia ki nongsengkam.
U Symbud Myntri Rangbah ka Jylla u Bah Sniawbhalang Dhar ula ong, ba kane ka jingialang kadei ka jingialang kaba don ia ka histori bad ka banjur ba kane ka rynsan ka iapher na ki iew iadei iathied ne Trade Fair da kaba long kaba la lamkhmat da ki nongthied bad kaba pynleit jingmut ha ka jingpynwandur jong ka jingiadei.
Kine ki nongthied kidei kiba mihkhmat na ki ri kiba kynthup ia ka South Africa, Canada, Australia, Russia, Kenya, New Zealand, Sri Lanka bad Romania, ha ki liang ki bapher bapher ha ki mar kiba pynmih na ki marrep, ki mar thain kti, ki mar kiba pynmih na ki siej, ki musli musla, Texitiles bad Herbal Wellness.
U Chief Secretary u Dr. Shakil P. Ahammed ula pynpaw ba ka Meghalaya kala treikam ha ka rynsan kaba khlain, ki bynta kiba pynleit jingmut jur bha ha ki mar rep kiba rep khlem ai dawai bad kiwei kiwei ki jingpynmih.
U Commissioner & Secretary u Sanjay Goyal ula ong, ba ka MSME kila noh synniang jan 45% ia ka jingkhaii ka ri India bad ka jingkhaii ka jylla Meghalaya ruh ka long kaba biang bha kaba kdew ba ka don bha ia ka lad ban kiew shaphrang.
Ka Nongmihkhmat jong ka FIEO ka Neha Mehra kala kdew ba ka Meghalaya kala kiew na ka kyrdan kaba 27 ha ka NITI Aayog’s Export Preparedness Index bad kala pynpaw ban iai bteng ban ai ka jingkyrshan ha kaba iadei bad ka jingai jinghikai pyntbit bad ban pynsngewthuh ia ki sienjam ha kaba iadei bad ka khaii pateng.
Kane ka jingialang ka Baar Sngi kan kut ha ka 4 tarik u Rymphang ha kaba kin don ki jingialang bapher da ka jingthmu ban pynkylla ia ka jingiasyllok sha ka jingshim syndon ia ki mar ban khaii pateng kaban wanrah ia ka jingkylla ia ka jingangnud ka Meghalaya ban khaii pateng ha ka pyrthei.
, da kaba wanrah ia ki 28 tylli ki kynhun kiba na ki 16 tylli ki ri ban iakynduh markhmat bad palat 100 tylli ki MSME ne karkhana rit jong ka jylla.){kind=link}