Shillong, Naiwieng 17: Ka Indian School of Business (ISB) ryngkat bad ka sorkar Meghalaya, kila pynlong ia ka Public Policy Workshop naka bynta ki MLA ka jylla Meghalaya.
Ia katei ka workshop la pynlong da ka Bharti Institute of Public Policy ha ISB ryngkat bad ka Meghalaya Institute of Governance kaba la sdang ha ka 16 tarik bad kan kut haka 18 tarik u Naiwieng.
U Lamphang ka Jylla Thomas A Sangma ula ialam ia ka kynhun ki MLA ka Jylla ba kynthup ia u Nongialam ka Liang Pyrshah u Bah Ronnie V Lyngdoh, u Government Chief Whip Bah Nujorki Sungoh bad u Opposition Chief Whip u Saleng A Sangma ryngkat bad ki 35 ngut ki MLA jong ka jylla bad 20 ngut ki ophisar jongka Meghalaya Legislative Assembly bad Meghalaya Institute of Governance.
Katei ka workshops kan iarap ia ki MLA ba kin sngewthuh ia ka jingseng kam kaba kyrpang bad iaka jingbei tyngka ha kaba iadei bad ka jingdon jingem jong ka jylla ha ka liang ki jingthung, ki mrad bad ki sawdong sawkun ki jongka bad kane kan iarap ruh ia ki samla ba kin ioh ia ka lad ban seng ia ki kam kiba thymmai.
La ai jinghikai ia ki MLA ha kiba bun ki liang ba kin lah ban kyntiew ia ka jinglong jingman ha ka jylla khamtam ha ki jaka riewlum bad ha ki thain nongkyndong kiba don ha kylleng ki bynta jong ka jylla.
U Aarushi Jain, Policy Director ka Bharti Institute of Public Policy, ula ai jingbatai shaphang ka Meghalaya Legislative Research Fellowship bad ia ki kam ki jam ban kyntiew ia ki constituency.
Ha katei ka workshop ki nongiashimbynta kila ioh ia ka lad ban iakren markhmat bad ki riewpawkhmat kiba kynthup ia u Amarjeet Sinha, IAS (Retd.) u Nongaibuit barim jong u Myntri Rangbahduh ka ri, u Venu Rajamony, u Ambassador ka ri India sha Netherlands, u Prof. Ashwini Chhatre uba long u Executive Director jongka Bharti Institute of Public Policy.
U Sampath Kumar, Principal Secretary bad Development Commissioner, jong ka sorkar jylla ula ong, ba u khmih lynti ban lah ban pynkhlain ia ka jingiadei hapdeng ka sorkar Meghalaya bad ka Indian School of Business bad kane ka workshop kan long ka jingmyntoi bad kan iarap ha kiba bun ki liang.
Ki MLA kila leit ruh ban jngoh ia ka T-HUB, kaba dei ka public-private startup ecosystem jongka sorkar Telangana bad ban leit jurip iaka Telangana State Integrated Command and Control Centre, kaba long kaba kyrpang tam ha ka ri baroh kawei.
