Shillong, Nailar 10: Ka symposium ba ar sngi halor ka phang Community Based Tourism in North East India’ la pynlong daka Dr. APJ Abdul Kalam Centre for Policy Research and Analysis, IIM Shillong naduh 10 haduh 11 tarik mynta u bnai.
Ia kane ka symposium la plie paidbah da u Myntri ka tnat jngohkai pyrthei ka jylla Nagaland u Temjen Imna Along haka jingdon lang u Gaigongdin Panmei, IRS, NEC, Atul Kulkarni BoG ka IIM Shillong bad Prof. D.P. Goyal Director, IIM Shillong, u Centre Coordinator jong ka Dr. Kalam Centre, IIM Shillong u Dr. Sanjeev K Ningombam, Dr. Ningombam lem bad kiwei kiwei de.
Haba kren ha kane ka sngi u Myntri ula ong ba ka tnat jngohkai kam lah ban treikam marwei hynrei ka donkam ban iasyllok lang bad kiwei ki tnat ban kiew shakhmat.
U Temjen Imna Along ula ong ba ka Thain Shatei Lam Mihngi kadei ka thain kaba riewspah a mei mariang bad haki 10 snem, ka thain kala sdang kiew bha ha ka jingwan ki nongwan shangkai suwari bad kane kadei namar ka thain kala sdang don ki surok bad ki lynti synkien kiba bha bad kibapaka ban pyniasoh ia kawei ka jylla sha kawei pat.
Ula ong ruh ba watla ka thain kala sakhi ka jingwan tuid ki nongwan shangkai suwari hynrei ki dang don shi bun ki jaka shangkai hapoh ka thain North East ha kaba ki paidbah kim pat ju poi.
Naka liang u Prof. D. P. Goyal ula pynkynmaw ba ka long ka jingdonkam iaki tnat sorkar bad kiba khmih iaka kam jngohkai ban iatreilang ban kyntiew iaka kam jngohkai pyrthei hapoh ka thain shathei lammihngi (North East).
U Prof. D. P. Goyal ula ong ba ka IIM Shillong kadei ka shlem ai jinghikai institution of National Importance (INI) kadei ban kyntiew iaka thain shathei lammihngi bad ula ong ba ki don haduh 390 ngut ki samla pule kiba tbit kiba la pule ha IIM Shillong kiba dei ruh kiba tbit ha baroh kawei ka ri India.
U G. Panmei ula ong ba ka long kaba donkam eh ban don ka jingiasoh hapdeng baroh 8 tylli ki jylla ka thain shathei lammihngi bad ula pyntip ba katkum ka jingwad bniah naka World Bank Group ka thain shathei North East ka don 5 tylli ki Segment hala jongohkai pyrthei ba kynthup ka Cultural tourism, Adventure tourism, Nature Tourism, Agro-Tourism bad Health Tourism.
U G. Panmei ula ong ba ka long kaba donkam ban don daka Common Registration Process lane ka jingpynrung kyrteng iaki briew kiba kwah ban wan shangkai shapoh ka thain North East khnang ban ki briew kiba wan sha kane ka thain kin ioh ka jingsngew shngain.
Ula ong ruh ba ka donkam ban ai jinghikai iaki briew sha man la ki shnong halor ka jingdonkam ban don ka jingiatreilang ha ki shnong ban kyntiew iaki kam jngohkai pyrthei, ban wanrah iaki jingtei, ban pynbha iaki marbam bad kiwei kiwei de ban kyntiew iaka kam jingohkai pyrthei.
Naka liang u Atul Kulkarni ula ong ba donkam ban phai khmat shaka Community-based tourism (CBT) ban ai ka jingsngew shngain iaki briew kiba wan shapoh ka thain shathei North East ha ryngkat ka jingiatreilang bad ki bor shnong.
