Shillong, Risaw 20: Kum ka sienjam ban pynneh pysnah ia ka jingleh jong ki menbarim, ka Hima Lynniong ha ka sngi Nyngkong, kala pynlong ia ka Tamasa Bam Niangphlang ha ka shnong Umsawmat ha kaba ki paidbah jong ka Hima kila wan ban bam ia u niangphlang uba la shet ha ki rukom bapher bapher.
Ia kane ka tamasa la pynlong da ka Hima Lynniong da kaba iatreilang bad ka kynhun KSKHAW bad UMWS. La plie ia ka da u Myntri ka Tnad Arts and Culture Bah Sanbor Shullai kum u Kongsan ha ka jingdon lang u MLA ka Mawphlang Bah MB Kurbah, u Lyngdoh ka Hima Lynniong Bah Hamphere Lyngdoh Ryntathiang, ki myntri bad ki paidbah jong ka Hima.
U Lyngdoh ka Hima Lynniong ula ong ba kane kadei ka sien kaba saw ba kila pynlong ia kane ka tamasa bad kane ka tamasa kadei thik tang na ka bynta ki paidbah jongka Hima bad ka Hima kala kyrpad ia u Myntri Sorkar Bah Sanbor Shullai ban shimkhia lem namar ba ka Hima ka thrang ban pynneh pynsah ia kane ka tamasa tynrai bad ban pynlong ia kane ka tamasa kaba heh ha ki snem ban wan.
U Bah Sanbor Shullai ula ai ka jingiaroh ia ka Hima Lyniong kaba la shimkhia ha kaban pynneh ia ka tamasa tynrai bad ia kiwei kiwei ki jinglong tynrai jong ka riti, dustur bad ka kolshor.
“Ngan sa shimkhia ia ka jingkyrpad jong ka Hima bad ha u snem ban wan, ngin sa pynlong ia kane ka tamasa kaba heh da ka jingiatreilang hapdeng ka Hima bad ka Sorkar Jylla khnang ba kan ym dei shuh tang ka tamasa tang na ka bynta ki paidbah ka Hima hynrei kan dei ruh ka tamasa kaba khring ia ki paidbah bad ia ki nongjngohkai na kylleng ki jaka” la ong u Bah Sanbor.
