Shillong, Naitung 14: Ka Department of Law jongka North-Eastern Hill University (NEHU), ryngkat bad ka Indian Council of Social Science Research – North Eastern Regional Centre (ICSSR-NERC), ha ka sngi saitjain kala pynlong ia ka Workshop on “Three New Criminal Laws 2023” hapoh ka skulbah NEHU.
La pynlong ia kane workshop, da ka jingthmu ban ai jingpynshai bad ban sngewthuh halor ki lai 3 tylli ki aiñ kiba thymmai kiba la pyntreikam dang shen ha baroh kawei ka ri India.
Ka Director General of Police ka Meghalaya, ka Kong I. Nongrang, kum ka kongsna kala plie ia kane ka jingialang bad kala ai iaka jingbatai kaba bniah halor kitei ki 3 tylli ki ain kiba thymmai bad ka rukom treikam ka jong ki.
Ka Kong Nongrang kala banjur ia ka jingkongsan ba ki pulit kin pyndep ia ka kamram ka jongki bad kumjuh ban long kiba la pyntbit ialade katkum ka jinglong jingman ha kaba iadei bad ka jingmih jong ki kyndon jingbthah kiba thymmai bad ki Standard Operating Procedures (SOP) ban pynthikna ban ai iaka hok.
Nalor kane, kala pynpaw ruh ia ki jingeh bad ki jingtynjuh kiban mad na ka jingkiew sted ki kor teknoloji kum ka Electronic Documentary Evidence ha kaba iadei bad kitei ki aiñ kiba thymmai.
Ia kane ka jingialang la pyniaid da u Professor D.K. Nayak, Vice Chancellor In-Charge ka NEHU.
Ha kane ka workshop ha ka bynta kaba nyngkong la pyniaid ia ka jingialang da ka Kong N. Nongkynrih kaba long ka Director jongka Directorate of Forensic Science, Shillong ha kaba la ioh iaka jingkren na u Nongiasaid aiñ u S.P. Mahanta, Ronak Kumar u Public Prosecutor jongka CBI, u Bipul Das, DSP Crime Branch bad u Rajesh Kumar Jaiswal na ka NEPA.
Kine ki nongkren kila ai ka jingbatai kaba bniah shaphang ka rukom treikam bad shaphang kitei ki ain kiba thymmai.
Ha ka wat ka baar, ia ka jingialang la pyniaid da u Dr. R.K. Mishra bad la ioh iaka jingkren bad ka jingbatai bniah na ki riewshemphang kiba kynthup ia ka Dr. Daiahunlin Mawlong, Dr. Arpita Singh, Dr.Umeshhwari Dkhar bad Yophika Grace Thabah.
