Shillong, Nailar 17: Ka North East Students’ Organisation (NESO) hynne ka sngi balang kala pynlong ia ka jingiakhih da kaba shong kyllain mungor ha baroh ki Jylla ka thain Shatei Lam Mihngi, ban pynbor ia ka Sorkar Pdeng ba kan pyntreikam noh ia ki 12 tylli ki mat jingdawa ba kynthup ia ka jingpyntreikam noh ia ka Inner Line Permit (ILP) hapoh ka Thain Shatei Lam Mihngi baroh kawei.
Hangne ha Nongbah Shillong, ki Nongialam bad Dkhot ka Khasi Students Union (KSU), Federation of Khasi Jaintia and Garo People (FKJGP), Ri Bhoi Youth Federation (RBYF), Hynniewtrep National Youth Front (HNYF), Hynniewtrep Integrated Territorial Organization (HITO) ruh kila iashimbynta ha kane ka jingiakhih bala pynlong hapdeng ka jingpahara kaba jur bha.
Kane ka jingiakhih kala sakhi ruh ia ka jingwah ia ki banner ba ong “ Ka CAA ka dei ka ain ia ki poi wir, ka ILP ka dei ka ain jong ki paid trai ri”, Kem, weng bad pynphai biang ia ki poi wir na Meghalaya”, “ Pynrung noh ia ka Ktien Khasi ha ka khyrnit ba phra” bad kiwei kiwei.
Ka NESO kala dawa ruh ban pynduh pyndam noh ia ka Armed Forces Special Powers Act (AFSPA), 1958, pyndam noh ia ka Citizenship Amendment Act (CAA), pyntreikam noh mardor ia ka Assam Accord, pynbeit noh ia ki jingiakajia pud hapdeng ki Jylla ka thain bad ruh bad ka Ri ba amrjan, wanrah ia ka Education Policy ba kyrpang tang jong ka thain Shatei Lam Mihngi haba pynshong nongrim kat kum ka kolshor bad ka histori jogn ka thain.
Haba kren sha ki nongthoh khubor, u Chairman ka NESO Bah Samuel Jyrwa ula ong ba kane ka jingshong kyllain mungor bala pynlong da ka NESO ka dei kaba la pynlong ha baroh 7 tylli ki Jylla ka thain namar ka Sorkar India kala phai lyndet ia ki jingdawa kiba dei na ka bynta ban iada ia ki paid riewlum jong ka thain.
Une u Nongialam ka NESO ula ong ba ka Sorkar India ym tang ba kala leh kyllut hynrei ha ka jaka ban pynur long noh ia ki jingdawa, kala pyntreikam lane wanrah pynban da ka CAA kaba long pyrshah ia ka bha ka miat jong ki paid riewlum ka thain Shatei Lam Mihngi baroh kawei.
“Namar kata, ngi dawa ia ka Sorkar Pdeng ban pyntreikam noh ia kine ki mat khnang ba kan nym don jingma ia ka snap ba kyrpang jong ngi ki paid riewlum lashai lashisngi” ong u Bah Samuel uba dei ruh u President barim ka KSU.
Haba kylli ia ki sienjam ban sa shim hadien, u Bah Samuel ula ong ba ki Sengbhalang ba pyniasoh bad ka NESO kin sa iakynduh na ka por sha ka por ban pynbeit bad shim rai ia ka sienjam ba dei ban shim.
“Ki Sengbhalang kum ka KSU, GSU, AASU bad kiwei kiwei kiba la pyniasoh sha ka NESO ki lah ban shim ia kano kano ka lynti jong ka jingiakhih na ka bynta ka bha ka miat jong ki paid riewlum ka thain” ula ong.
Halor ka jingpynslem ka Sorkar Pdeng ban pyntreikam ia ka ILP ha Jylla wat haba ka Iingdorbar Thaw Ain ka Jylla kala dep mynjur ia ka Resolution ha u snem 2019, une u Chairman ka NESO ula ong ba ka ILP kam dei shuh kaba dang thymmai namar kala kot palat ia ka 30 snem naduh ba ka KSU kala dawa ban pyntreikam ia kane ka ain ban ai jingiada ia ki paid riewlum trai ri n aka jingwan rung kyrthep ki briew nabar ka Jylla.
“Hynrei, ngim tip ia kaei kaba don ka jingmut jingpyrkhat jong ka Sorkar Pdeng namar haduh mynta kam pat kren shai lane pyni dak ia kaei kaba ka mut..Kane ka pyni ba ka Sorkar India kam don jingsngew eiei ruh em ha kaban iada ia ka snap kyrpang, pynneh ia ka riti tynrai jong ngi ki paid riewlum ka Jylla bad kiwei ki Jylla ka thain Shatei Lam Mihngi ruh kumjuh” ula ong.
U Bah Samuel ula pynkynmaw ba kane ka jingiakhih ka long ruh pyrshah ia ka jingleh kmienah jong ka Sorkar India ia ka thain Shatei Lam Mihngi naduh b aka Ri ka ioh laitluid.
U Bah Samuel ula ong b aka NESO kan ym leit satia sha Delhi ban tynjuh ia ka Sorkar Pdeng namar ka la tip bha ia ka jingdawa ILP bad kiwei kiwei ki mat kiba ktah ia ki paid riewlum jong kane ka thain.
