Nongpoh, Rymphang 03: Ki nongialam ka Ri Bhoi District Congress Committee (RBDCC), ki la pynlong ia ka jingiakhih da kaba iashong kyllain mungor ha Indoor Stadium, marjan ka Ophis u Deputy Commissioner, ban pynpaw ia ka jingpyrshah kaba jur halor ka jingpynkylla ka Sorkar NDA ia ka skhim MGREGA sha ka Viksit Bharat Guarantee for Rozgar and Ajeevika Mission (Gramin) lane VB-G RAM G Act, 2025.
Ia kane ka jingiakhih la ialam da u President ka RBDCC Bah Rocky Marwein, kiba la rah lang ia ki poster ba don ia ki jingthoh ba pynrem ia ka jingleh jong ka Sorkar NDA.
U Bah Rocky ula pyntip ba kum ka party kan nang bteng ban ieng pyrshah ia ka jingleh donbor jong ka party BJP ba ialam ia ka Sorkar Pdeng kaba la shu pynkylla jubor ia ka skhim MGNREGA kaba la ai jingmyntoi shikatdei eh ia ki paidbah ka ri naduh u snem 2005. U ong ba kane ka jingleh ka Sorkar BJP kan ktah shikatdei eh ia ki briew ba don job card.
Ula ong ba ka MGNREGA ha ki 20 snem bala leit, kala pynkylla dur ia ki shnong ki thaw, kala ai jakpoh ia ki nongshong shnong bad ai bylla khlem da donkam ban leit wad bylla sha jngai. U ong ba mynta ki nongshongshnong kin duh noh ia kane ka hok haba kam ba ka jingkam ka Sorkar BJP ba kyntiew ia ka sngi bylla sha ka 125 sngi ka dei tang ka jingpynthame.
“Ka skhim VB-G RAM G Act, 2025 ka ktah bad kan pynduh ia ka bor jong ki Shnong ki thaw ne jong ki Village Employment Council, mynshwa katba dang synshar ka Congress ka kam ka jam, ki jingsiew baroh la pyntrei beit da ki VEC hynrei naduh ba synshar ka BJP naduh 2014, baroh ki la kylla lut, baroh ki job Card Holder kim ioh shuh ia ka bai bylla jong ki ha ki por ba biang bad ki hap da ki taiew bad mynta lei da ki bnai, mynshwa ban thied tiar ban jied ia ki vendor ruh la ai bor ha ka shnong mynta pat ym lah shuh bad kiwei kiwei ki jingeh kiban nang mih ha kane ka skhim thymmai”, ong u Bah Marwein.
U la iathuh ruh, ba ymtang ha Nongbah New Delhi ba ka party ka iakhih halor kane ka mat, hynrei kumba la bthah naduh ka AICC bad MPCC, ia ka jingiakhih la pynlong ha man ki jaka ban dawa pynneh ia ka skhim MGREGA.
Ha kane ka jingiakhih kaba jaijai, na ka liang ka RBDCC ka la leit ban aiti ruh da ka dorkhas sha u Deputy Commisioner ban phah ia ka khubor bad ki mat jingdawa sha ka sorkar pdeng.
, ki la pynlong ia ka jingiakhih da kaba iashong kyllain mungor ha Indoor Stadium, marjan ka Ophis u Deputy Commissioner, ban pynpaw ia ka jingpyrshah kaba jur halor ka jingpynkylla ka Sorkar NDA ia ka skhim MGREGA sha kaViksit Bharat Guarantee for Rozgar and Ajeevika Mission (Gramin) lane VB-G RAM G Act, 2025.){kind=link}