Shillong, Jylliew 30 : Ka Ryntih Sports Club ka la ioh ban pynliem haduh 3-1 kol ia ka Mawkhar Sports Club ha ka lympung ialehkai jong ka Shillong Premier League kaba long ha kane ka janmiet sngi Palei ha madan Third Ground Polo, Shillong.
Ha ka jingialehkai ha katei ka sngi, ka jingiakhun ha ka kylla step ka long kaba mar iakhaid namar ym shym la don satia mano mano ruh ba ioh ban thep kol. Kumta dei tad ynda la poi ka kylla miet ba ka jingialehkai ka la kham itynnad khamtam haba baroh arliang ki la iakhun tyngeh ban ioh pynkhih jar.
Ia ka kol kaba nyngkong ha kane ka sngi la ioh ban thep da u Bickyson Kharkongor ha ka minit kaba 49 jong ka kylla miet bad tang hadien khyndiat minit u la ioh biang ban thep sa shi kol kaba pynlong ia ka kynhun ban ioh lamkhmat haduh 2-0 kol tang ha ki 60 minit jong ka jingiakhun.
Pynban dei ha ka por bym poi pyrkhat, ka Mawkhar ruh lyngba u Banehskhem Khongsdam u la ioh lang ban pynkhih jar ha ka minit kaba 61 kaba pynlong ia ka jingialehkai ban neh da 2-1 kol.
Kumta ha ka jingiakhun kaba la nang shongshit bha namar ka Mawkhar ruh ka pyrshang borbah ban ioh pyniakhaid, na ka liang ka Ryntih ka la ioh ban thep biang sa shi kol ha ka minit kaba khatduh artad jong ka kylla miet ban pynskhem artad ia ka Ryntih ban khur suk ia ki lai point ha katei ka janmiet.
