Shillong, Jylliew 30 : Ka Bharatiya Janata Party (BJP) Meghalaya ka la kynthoh tyngeh ia ka sorkar Congress ha Udaipur, Rajasthan halor ka jingshah siah ryndang uwei u nongsuh jain ha ki arngut ki briew, da kaba ong ba katei ka jylla kam slem ban kylla ka jylla leh donbor hapoh ka jingialam jong ka Congress.
Ha katei ka jingjia, uwei u nongsuh jain uba kyrshan ia ka Nupur Sharma u la duh ei ia ka jingim hadien ba ki runar ki la rung kynsan ha dukan jong u bad pyniap da kaba siah na ryndah.
Halor kane, na ka liang u president ka BJP, Bah Ernest Mawrie u la kyntu ia ki paidbah ka ri ba kin kiar katba lah na ka jingsngew iapher jaidbynriew halor katei ka jingjia.
U la kyntu ruh ia ki paidbah na ki kynhun bapher bapher ba kim dei satia pat ban ailad ia kum kitei ki jingjia kin ioh jaka ha ka imlang sahlang ha ka ri India. Ha kajuh ka por u ong ruh ba, katkum ki kyndon ain jong ka ri, kito kiba donkti ha katei ka kam ki dei ban ioh ia ka jingpynshitom kaba tyngeh khnang ba kiwei pat kin ym nud shuh ban leh.
Na ka liang u Secretary ka Shillong Muslim Union ba dei ruh u Myntri barim ka sorkar jylla bad nongialam ka Congress, u Sayeedullah Nongrum da kaba pynrem halor katei ka jingjia u la ong, “Ia kum kane ka kam leh riewkhlaw yn ym ailad satia ha ka Islam bad ka long pyrshah ruh ia ka Shariat.”
Ka jingshah pyniap jong utei u nongsuh jain kaba la ring dur ruh da ki nongpyniaid ka la wanrah ka jingkhihwin kaba jur bha ha Udaipur. La khang ruh ia ki jingialang lum paidbah bad la khang ruh wat ia ki kor internet ha baroh kawei ka Rajasthan na ka bynta 24 kynta.
Ia kitei ki briew ba la paw dur ha camera ba tip kum u Gos Mohammad bad Riyaz mardor ki la shah kem.
