Nongstoiñ, Naiwieng 23: Ka kynhun ïalehkai phutbol jong ka Ri Bhoi United FC ka la jop da ar kol la kawei pyrshah ïa ka kynhun ïalehkai jong ka NACO Imphal, ha ka jingïalehkai jong ka pre quarter final kaba saw, ha ka lympung Invitation Knockout Football Tournament 2022-23, ba la pynïaid da ka New Nongstoiñ Sports Social and Cultural Club ha madan New Nongstoiñ.
Ha kane ka jingialehkai kaba ïakhaid bad mar biang bor bha, ka kynhun jong ka NACO ka la lah ban thep shwa ïa ka kol ha ka kylla step. Hynrei, ha ka kylla miet ka Ri Bhoi United FC ka la ïakhun dukhi khait bad khlem ai lad shuh ïa ka NACO, kat haduh ba ka la ioh ban thep ruh ïa ki ar kol kiba kongsan na ka bynta ka kynhun, ban ioh rung ïalade sha ka quarter final jong kane ka lympung.
Na ka liang ki nongpynïaid ki la jied ïa u Rostom Khriam jong ka Ri Bhoi United FC kum u rang ïalehkai ba tbit tam jong ka jingïalehkai. Ka jingïalehkai ka ban bud kan long ha ka 1 tarik u Nohprah ha kane hi ka madan ha Nongstoiñ bad kan long hapdeng ka Shillong Lajong FC pyrshah ïa ka Oil India Football Team.
