Shillong, Risaw 11: Ka Mylliem kala jop da 1-0 ia ka Nangkiew Irat ha ka jingiakhun ia ka Shillong Premier League 2025 kaba la long ha SSA Stadium, First Ground, Polo, hynne ka sngi Saitjain.
U Alem Khongwir ula ioh the pia katei kawei ka kol ha ka minit kaba 20, kaba la ia ka Mylliem ban khur ia ka jingjop.
Mar ia sdang ka jingiakhun ha ka kylla step, la sakhi ba katto katne ki nongialehkai ka Nangkiew Irat kim shym la ioh ban mih madan namar ka jingshah suspon, jingmynsaw bad na kiwei pat ki daw, kaba kynthup ia u nongialehkai uba la thep bun kol eh Himanshu Patil, u Khangmiki Pale bad u nongap kol u Surjay Kumar Pariyar.
Ka Mylliem, ha kawei pat ka liang kala don ia ka jingkhlain bor kaba pura lait noh tang ka jingbym don u Shaibor Nongrum.
Ha ka minit kaba 19 u Wanshanlang Dkhar ka Mylliem ula ioh ia kabu ksiar ban thep ia ka kol hynrei katei ka bol kala leit dei ia u diengkol bad mih noh shabar. Hynrei tang hadien shi minit ula shut bad pynpoi ia ka bol sha u Alem ha kaba ula ioh thep ia ka kol na ka bynta ka Mylliem.
U Alem mynta ula wan baar ha ka jingiaknieh kum u nongialehkai ba ioh thep bun kol bad mynta ula ioh thep 6 kol da kaba ia ryngkat bad u Himanshu bad u Emanbha Marbaniang jong ka Shillong Lajong hynrei ia ka kyrdan kaba nyngkong la bat da u Loving Suting jong ka Mawlai uba la ioh thep 7 kol.
Ka Nangkiew Irat kala ioh bun tylli ki kabu ha ka kylla step abd ha ka kylla miet hynrei kam shim la lah satia ban thep kol haduh ban da kut ka jingiakhun.
Ka Nangkiew Irat ka dang sah ban iakhun pyrshah ia ka Lajong ha ka jingpynkut noh ia ka jingialehkai ha ka samoi kaba mynta, katba ka Mylliem kan iakhun pyrshah ia ka Rangdajied United ha ka jingialehkai kaba khatduh eh ka jongka.
Da kane ka jingjop, ka Mylliem mynta kala ioh 11 point bad don ha ka kyrdan kaba 5 katba ka Nangkiew Irat kaba la ioh 13 point kala don ha ka kyrdan kaba 4 jong ka SPL 2025.
Ha ka sngi Nyngkong, ka Nongrim Hills kaba lah thikna ba kan shah pynhiar kyrdan noh kan iakhun pyrshah ia ka Lajong ha ka por 4:30 bad lada ka Lajong ka jop kan ioh knieh ban bat ia ka kyrdan kaba nyngkong.
