Shillong, Jymmang 03: Ka Meghalaya kala pynrem da 2-1 ia ka Kerala ha ka jingiakhun ha ka Group A jongka Swami Vivekananda U-20 Men’s National Football Championship 2025 kaba la long ha Narainpur, Chhattisgarh, hynne ka sngi Saitjain.
U Banlamkupar Rynjah ula thep ia ka kol ha ka 27 minit bad u Deibormame Tongper ula thep ia ka kol ha ka minit kaba 68 na ka bynta ka Meghalaya, katba u Mohammed Adhnan ula thep ia ka kol ha ka 90’+1 lyngba ka jingleit shut ia ka Penalty.
Ka Meghalaya kala pynrem ia ka Rajasthan ha ka jingiakhun kaba nyngkong kaba la long ha ka 29 tarik u Iaiong bad mynta kala ioh ban khur ia ka jingjop kaba ar bad ioh 6 point.
U Coach ka Meghalaya u Bah Bobby L Nongbet ula pynmih bujli tang ia uwei u nongialehkai ha kane ka jingiakhun kaba mynta da kaba wanrah ia u Ricky Kharkongor ban pynialehkai ha ka jaka jong u Pyrkhatshaphrang Sumer.
U Banlamkupar ula thep ia ka kol da kaba shut da ka kadiang kaba la iaid lyngba u nongapbak bad ia u nongapkol bad kane ka bol kala leit rung shapoh kol bad ka Meghalaya kala ioh ban tam da 1 kol ha ka kylla step.
Ka kol ka baar kala wan lyngba ka jingbakla jong u nongapkol ka Kerela u Devanandan ia kaba ym shim la ioh shut bha ia ka bol bad kala poi sha u Deibormame ia kaba ym shim la pynlehnohei bad ula ioh ban thep da kaba suk ia ka kol.
Hashwa ban kut noh ka jingialehkai, ka Kerela kala ioh iaka Penalty bad u Adhnan uba la leit ban shut ula ioh ban thep ia ka kol.
Watla ka Kerela kala pyrshang ban ioh thep biang sa shi kol ban poi sha ka jingiakhaid hynrei ki rangialehkai ka Meghalaya kila ialehkai bha bad kim shym la ailad satia hynrei kila iakhun tyngeh ban pynthikna ba ka Meghalaya kan ioh khur ia ka 3 point.
Ka Meghalaya kan hap ban iakhun sa shisien ha ka Group A pyrshah ia ka Bihar kaban long ha ka sngi Nyngkong.
