Shillong Risaw 29: Kum shi bynta jong ka jingrakhe iaka ‘Azadi Ka Amrit Mahotsav’, ka Border Security Force Meghalaya kala pynlong iaka jingialehkai Volleyball bad ki shipai Border Guard Bangladesh ha BSF Outpost Baghmara, South Garo Hills District bad ha katei ka jingialehkai paralok ka BGB kala pynliem iaka BSF.
Katei ka jingialehkai ka dei kum shi bynta ban wanrah iaka jingiadei paralok kaba iajan hapdeng ki shipai jong kine ki ar tylli ki ri kiba ia sah mar shilliang jong ka khappud.
Ha katei ka jingiakob ka BGB kala jop da 3 la 1 iaka BSF ia kaba la wan ban sakhi da ki heh ophisar jong ka BSF bad BGB, ki riewpawkhmat bad ki nongshong shnong ka thaiñ khappud.
U Ratikant Thakur, Commandant jongka 43 Bn BSF ula pdiang sngewbha iaka kynhun jong ki 20 ngut ki dkhot jongka BGB kiba la wan ban iashimbynta ha katei ka jingialehkai paralok kaba la ialam da u Lt Col ASM Zakariya, Commanding Officer jongka 31 BGB.
Kitei kiar tylli ki kynhun kila ialehkai bha met bad mynsiem bad kila pyni ruh iala ka sap ka phong bad hadien bala kut ka jingialehkai la sam ia ki khusnam ryngkat bad ki jingai sngewbha sha ki nongialehkai jongka BSF bad BGB.
