75 ngut ki scholar kin leit sha Vietnam, Cambodia bad Tibet
Shillong, Nailar 18 : U Myntri Rangbah, Conrad K Sangma, mynta ka sngi, ula pynlait ia ka, ‘Ki Dienjat’, ka jingwadbniah ban khmih biang ia ka jingdon jingiadei ka rukom im bad ka kolshor jong ki paid Khasi-Jaintia bad ka thain Southeast Asia.
U Myntri Rangbah haba ai jingkren, ula ong, “Ki Dienjat”, ka dei ka lynti iaid ban shem pat-pyniasoh biang ia ka mynnor jong ngi khnang ban gin lah ban sngewthuh kham bha ia ka mynta bad pynwandur ia ka lawei jong ngi. Ula bynrap ba ka jingpynlait ka dei shibynta jong ka jingpyrshang ba iai bteng ban buh jingthoh, tyngkai bad rakhe ia ka kolshor bad ka histori jong ka Jylla jong ngi, bad ban ai ha ki briew ia ka atiar ban lap biang iala ka tynrai.
Ula bynrap ba haba pynshong nongrim na ki kot ki sla jong ka juk synshar ka ri Bilat bad ka jingstad nala tynrai, ki scholar bad ki nongwad bniah trai ri, kala poi sha ka jingmynjur lang ba ka Jaidbynriew Khasi bad Jaintia ki lah ban dei kiba mih n aka thain kum ka jaka ba tip mynta ka Cambodia bad Laos.
Ula pynpaw shuh shuh ba ki jingwad bniah ia kaei kaba long ba man mynta ban pynshisha ia kine ki jingdon jingiadei kat kum ka histori kala shah khanglad da ka jingduna ka jingbei tyngka ban leit wad jingtip shabar Ri, ki jingeh ha ka liang ka jingpynbiang ia ki jingdonkam bad ki jingiadei sain pyrthei ban leh ia kine ki thain, ka jingbym don ka jingiatreilang kaba la pynbeit ryntih ha ka kam pule bad wad bniah, bad ka jingkyrshan ba pahuh ia ki jaka pule.
“Ban weng ia kane ka jingeh, ngi la thung ia ka kynhun wadbniah ba kyrpang hapoh ka Tnad Arts & Culture, haba wanrah lang ia ki scholar ba pawnam bad ki Ophisar ba kin ialam ia ka jingpyrshang ban leh bniah, jingpyrshang ban wad jingtip, buh jingthoh bad shong bishar ia ki tynrai ki longshuwa jong ki Jaidbynriew jong ngi” ula ong.
Halor ka Ki Dienjat e-Portal bala pynlait ha kane ka jingialang, u Myntri rangbah ula ong ba ka e-Portal ka dei kaba la pynwandur ban lah pynlong ia ka jingwad bniah kaba kham treikam, kaba lah ban iohi da baroh bad ka rynsan ban ioh ia ki jingtip, ban lum thup ia ki data wadbniah bad ban pynlah ia ka jingiatreikam lang, ka ban pynsted ia ka jingiakren, pynduna ia ka jingpyndonkam ia ki kot ki sla bad ka jingpynlut ha ka jingpyniaid kam nalor ka jingpynjanai ia ka jingtreikam kaba shai bad ka jingkhmih bniah.
“Nga kyrmen ba kane ka portal kan ai jaka ruh ha kaba ki nongwadbniah, ki jaka pule bad ki jaidbynriew ki lah ban wanlang ban iasam ia ki jingtip bad ngam jylliew ia ka jingsngewthuh ia ka jinglong ba kyrpang jong ngi bad iaka pateng”
U Myntri Rangbah ula pyntip ruh ba watla ka jingpyrkhot ban leh ia ka jingwadbniah ia ka tynrai jong ki Jaidbynriew riewlum ka Jylla kala sdang naduh ka por u (L) PA Sangma, uba la ban jur ia ka jingdonkam ban leh ia ka jingwadbniah ba jylliew ia ka tynrai jong ki Garo. Ula pyntip ba kum kane ka project wad bniah yn sa pynlait ruh ha ri-lum Gar0 ha ka 1 tarik Nailur, 2026, ha ka ngi Kha jong u (L) PA Sangma.
Haba pynkut, u Myntri Rangbah ula pynkynmaw ia ka jingialang halor ka jingkongsan bad jingdonkam jong kane ka jing wadbniah bad khot ia ka jingiatreilang bad ka jingiashimbynta lang jong baroh ki kynhun ba don bynta.
U Myntri Rangbah ula pynlait ruh ia ka project document ne ki kot ki sla jong ka project bad plie ruh ia ka kamra leh research jong Ki Dienjat hapoh ka Williamson Sangma State Museum, Shillong.
Ka Tracing the Roots Projecr ka dei ka project ban lum bad buh jingthoh ia ka histori jong ki jaidbynriew trai muluk ka Meghalaya, ka ktien ka thylliej, ka kolshor bad ka jinghiar pateng.
Hapoh kane ka project, 75 ngut ki scholar kin leit sha Vietnam, Cambodia bad Tibet ban wad bniah ia ka thymmei bad ka lynti iaid jong ki Khasi, Jaintia bad Garo sha kane ka thain.
Kiba la iadonlang ki kynthup ia u Myntri ka Arts & Culture Bah Sanbor Shullai, u Justice Hamarsan Singh Thangkhiew, Principal Secretary, Arts & Culture, ki dkhot ka kynhun wadbniah bad ki Ophisar na ka tnad Arts & Culture.
