Shillong. Lber 09 : Ka North Eastern Council kala pynlait ia ka song pisa ba T.67.41 klur ha u bnai Rymphang na ka bynta ki skhim ha baroh ki phra tylli ki Jylla ka thain Shatei Lam Mihngi bad ki Agency ka thain, kiba thmu na ka bynta ki surok, ki farm, kam jngohkai, kam wadbniah bad ki kam ba iadei bad ka kolshor.
Jan kumba shiteng – T.30.07 klur- ka leit sha ki jaka pule kum ka IIT-Guwahati, IIM-Shillong, NESAC bad NERCRMS.
Ha Meghalaya, ka song pisa ka kynthup ia ka project shna jingkieng maw halor ka wah Lunar kaba pyniasoh ia ka Khaddum sha Brichyrnot ha East Jaintia Hills bad ka Seng Khasi Cultural Complex ha Lum Shat Sngi, Kenches Trace, Shillong.
“Napdeng ki Jylla ba ioh jingmyntoi na kane ka song pisa bala pynlait, ka Meghalaya kala ioh ia ka jing kyrshan na ka bynta ki project kam pynroi bapher bapher kiba dang iaid mynta, kiba thmu ban pynkhlain ia ki lad pyniasoh bad ka jingkyntiew ia ka kolshor hapoh ka Jylla” kala ong.
“Kawei na ki jingtei ba kongsan ki kynthup ia ka jingkieng RCC ha Wah Lunar ba pyniasoh ia ka Khaddum sha Brichyrnot ha East Jaintia Hills, ka ban pynkhlain ia ki lad pyniasoh sha ki jaka nongkyndong bad pynsuk ia ka leit ka wan ki shnong ki thaw ka thain, kynthup ki Jaidbynriew Hmar. Nalor kane, ka NEC kala kyrshan ruh ia ka jingtei ia ka Cultural Complex ka Seng Khasi Ri Raid Laban ha Lum Shat Sngi, Kenches Trace, Shullong, kaba la khmih lynti ban shakri kum ka centre ba kongsan ban pynneh pynsah bad kyntiew ia ka kolshor ka jaidbynriew trai ri bad ka jingleh niam leh rukom nala tynrai jong ka thain”.
Nalor ka song pisa bala mang kyrpang sha ki Jylla, ka NEC kala pynlait ruh ia ka song pisa ba T.30,07,14,985 sha ki Regional Institution bad kiwei ki agency ha kylleng ka thain Shatei Lam Mihngi ha une u bnai.
Ki project ba kham heh ki kynthup ia ki prokram halor ka rep ka riang kaba neh, ka sengkam sengjam kynthup ka Farming ba pyndonkam da ka AI, ka jingpyntrei ia ki jingtei, ka jingshna ia ki madan ialehkai, ka jingkyntiew ia ki kam jngohkai, ka jingkyntiew ia ki kam wadbniah bad ki lynti treikam ba thymmai bad kiwei kiwei.
Ia kine ki project la pyntreikam lyngba ki jaka pule ba paw kynthup ka IIT-Guwahati, IIM-Shillong, Northeast Space Application Centre (NESAC), North East Handicraft and Handloom Development Corporation (NEHHDC), North East Region Community Resource Management Society (NERCORMS) bad kiwei ki University ka thain.
