Shillong, Nailur 27 : Ka jingplie ia ka Vivanta Taj Hotel ha Shillong la pynkynriah noh shaduh ka 14 tarik u bnai Risaw ong u Myntri Rangbah ka jylla Conrad K Sangma hynnin ka sngi Nyngkong.
“Ngi la buh 14 tarik u Risaw kum ka sngi plie,” u la ong da kaba pynpaw ba katei kan dei ka sngi ba kin plie ia ki kamra bad kiwei kiwei ki bynta jong katei ka hotel.
Shwa kane, ka sorkar ka la pynbna ba kan plie noh ia katei ka hotel ha ka 27 tarik u Nailur hadien ba ka jingpyntrei ka la sahteng la da ki phew snem khlem lah pyndep shuh.
Hynrei u la ong pat ba namar ba na ka Taj ki dang pan por biang sa kumba 10 sngi ei ei kumta la buh kylluid noh ba kin plie ha katei ka sngi ha u bnai ban wan.
U Myntri Rangbah haba jubab halor ka jingthmu wan jong ka President ka Ri sha ka jylla, u la pyntip ba ka sorkar haduh mynta ka dang iai ap ia ka jubab na ka Presidential Secretariat.
“Ka la don ka jingpyntip kaba la wan sha ngi la kham slem ba ka President ka kwah wan sha Meghalaya bad pan ruh ki kyrteng jong ki projek bad kiwei kiwei kiba lah ban leh ha ka jingwan jong ka. Katei kadei ka sien kaba khatduh kaba ngi ioh ktien hynrei hadien kata ngi khlem ioh ei ie shuh bad haduh mynta ngi dang iai ap,” u la ong.
