Ban ailad ia ka Sorkar bad HPC ban iapynbeit shuwa dalade
Shillong, Iaiong 09 : Ka Iingkashari Meghalaya High Court ha ka sngi Ba-ar, kala pynkynriah ia ka jingshong bishar ia ka mukotduma ba iadei bad ka jingpynkynriah ia ki 342 tylli ki Longiing na Them Metor, Them Iew Mawlong sha ka 28 tarik Iaiong.
Ka Iingkashari kala shim ia kane ka rai ban ailad ia ka Sorkar Jylla bad ka Harijan Panchayat Committee ba kin wad ia ki lad ki lynti ha kaban pynbeit shuwa dalade ia ka kam.
Ka Iingkashari ba kynthup ia u Chief Justice IP Mukerji bad Justice W Diengdoh, ha ka hukum ba pynmih halor kane ka kam kala ong “ Da ka jingmynjur ki nongiasaid ain na baroh arliang mamla, ia kane ka jingkyrpad bad ki aplikeshon ba don jingiadei, la pynkynriah noh haduh ka 28 tarik Iaiong 2025 ban ailad ia ki liang mamla ba ki wad ia kino kino ki lynti ban iapynbeit”.
Ka Sorkar Jylla dang shen kala kyrpad ia ka Sorkar India ban mynjur ha kaban ai ia ka jaka ba shu iehshrah jong ki shipai kaba long kumba 2.5 acre ne 3 acre, kaba don mar pyrshah ka petrol pumo ha Iew Mawlong. La pan ia kane ka jaka ban pynkynriah ia kine ki longiing na Them Metor.
Ha ka 22 tarik Kyllalyngkot, u Myntri Rangbah ka Jylla Conrad K Sangma ula pyntip ba kane ka jingkyrpad jong ka Sorkar ban ai ia ka jaka shipai ha Contonment kala mad ia ki jingeh namar ka jingdon jong ki kyndon treikam bapher bapher ki shipai.
