Shillong, Iaiong 24 : Ka Iingkashari Meghalaya High Court hynne ka sngi Nyngkong, kala pynkynriah ia ka jingshong bishar halor ka kam ba iadei bad ka jingpynkynriah ia ka Them Metor na Them Iew Mawlong sha ka 7 tarik u Jylliew.
Ia kane ka hukum la pynmih da ka Iingkashari Division Bench halor ka jingkyrpad jong ka Sorkar Jylla bad ka Harijan Panchayat Committee (HPC) haba shong bishar hynne ia ka kam.
“Namar ka jingkyrpad jong ki liang mamla, ai ba kane ka kam ban wan phai sha ka jingbishar hadien hynriew taiew. Buh ia ka 7 tarik Jylliew, 2023” ong ka Iingkashari ha ka hukum.
Ha ka 21 tarik Iaiong, u Symbud Myntri Rangbah ba khmih ia ka Tnad Urban Affairs Bah Sniawbhalang Dhar ula pyntip ba ka Sorkar Jylla kala rai ba shen kan sa khot ia ka HPC sha ka jingiakren halor ka jingtyrwa ban pynkynriah ia ki 342 tylli ki Longiing na Them Metor sha ka jaka jong ka Shillong Municipal Board (SMB).
U Symbud Myntri Rangbah ba khmih ia ka tnad kam pohiing Bah Prestone Tynsong ula dep khot ia ka jingialang ha ka sngi thohdieng ba la lah ha ka jingiadon ryngkat u Bah Sniawbha bad ki Heh Ophisar ka Sorkar ban iakren ia kane ka kam, kaba long shisngi hadien ba ka HPC kala kyntait ia ka jingtyrwa jong ka Sorkar.
“Nyngkong eh ngi hap ban pule ia ka jubab (bala ai da ka HPC) bad ngin peit ia kaei kaba ki pynpaw bad halor kane, ngin sa khot ia ka jingialang” ong u bah Sniawbha haba pyntip ba ka Sorkar ka lah ban khot ia ka HPC sha ka jingiakren ha kane ka taiew ba mynta.
Ha ka jubab ba 6 sla bala phah sha u Deputy Secretary ka Sorkar Meghalaya bad kiwei ki Tnad ba dei khmih ia ka kam, ka HPC kala kynnoh ba ka jingtyrwa jong ka Sorkar ka dei ka bym pat biang pura, ka bym iahap, ka ba khlem pynkhreh bha, kaba lah shiliang bad ba bei riti”.
Kane ka jubab kala mih hadien ba ka jingaipor jong ka Sorkar kala kut 10 sngi hashuwa. Ka HPC kala ong ruh ha ka jubab ba “Ka don ka jingduna kaba khraw bha, ka jingpynkut ka bym iahap ha ka rukom shim sienjam bad ka jingle jong ka High Level Committee jong ka Sorkar Meghalaya”.
