Nongpoh, Jylliew 14 : Ka Federation of Khasi Jaintia & Garo People (FKJGP)-North Khasi Hills, kala pynkynmaw biang ia ka Sorkar Meghalaya Democratic Alliance-2 ba kan pynkha noh ia ka Community & Rural Development Block (C&RD) ha Mawhati- ban pynjan ia ka jingshakri ka Sorkar sha u paidbah bad ban lah kyntiew ia ka roi ka par jong ka thain.
Kumba long mynta, Kiba bun ki Shnong jong ka thain Mawhati ki don hapoh ka Umsning , Bhoirymbong bad Nongpoh C&RD Block-kaba la buh jingeh ia ki paidbah ha ka leit ka wan haba donkam ia ka jingshakri jong ka Block namar ka jingjngai palat kine ki jaka na Mawhati.
Ka FKJGP kala pynkynmaw ruh ia ki jingkren paidbah u Myntri Rangbah ka Jylla Conrad K Sangma ba ong ba ka Sorkar MDA ka dei ka Sorkar u paidbah bad kaba kwah ban pynjan ia ka jingshakri sha u paidbah. Kala ong “Haduh katno ka long kaba shisha ba ka Sorkar MDA ka dei ka Sorkar u paidbah. Lada ka dei shisha, ka dei ban ai noh ia ka C&RD Block la ka jong ia ka Mawhati kaba ka jingdawa u paidbah kala shu sahteng la slem slem bah”.
“Ka thain Mawhati ka dei kaba la heh bha ha u pud u sam bad ka jingdon u nongshongshnong. Ka Mawhati kala dei hok ban ioh iala ka jong ka C&RD Block namar ka jingeh ba hap ban mad da ki Nongshongshnong na ka daw ka jingshah pynhap lang ha ki lai tylli ki Block-Umsning, Nongpoh bad Bhoirymbong Block, kiba la jngai bah na ka thain” ong u Bah Shanlang Diengdoh, General Secretary ka FKJGP-NKH.
Kat kum ka jingong jong u “Ka por kala ih ba ka Mawhati kan ioh noh iala ka jong ka Block namar ka jingiaid jong ka por bad ka jingnang kiew ki shnong kiba don hapoh ka thain khamtam ka jingnang kiew ruh ha ka jingdon ki nongshongshnong kynthup naduh ki tynmen ki kro, ki samla bad ki heprit”.
Une u Nongialam ka FKJGP ula ong ba ka Seng kala mih ban dawa la bun snem ia kane ka Block hynrei ym shym la iohi satia ia kano kano ka dak ba ka Sorkar kan shimkhia ne phaikhmat lem.
Ka FKJGP kala kyntu ruh ia u MLA ka thain Bah Charles Marngar ba un tied lem ia ka jingkhang jong ka Sorkar ba kan phai khmat sha ki jingeh kiba don ha kane ka thain namar ka jingbym don iala ka jong ka Block.
“Ki Nongshongshnong jong ki Synjuk bapher bapher ka thain Mawhati ki long kiba kloi wat ban pynioh ia ka jaka ban buh ia ka Ophis ka Block lad aka Sorkar ka kloi ban pynkha ia ka Block ka ban shakri ia ki spah tylli ki Shnong jong ka thain Mawhati” ula ong.
Ula pyntip ba ka Seng kan sa leit ban iakynduh ia ki bor Nongialam ka Sorkar Jylla khamtam ia u Myntri ba khmih ia ka Tnad C&RD ban iakren halor kane ka kam.
Pule lang ia kane: Shah ktah eh ka Ri-lum Khasi Jaintia ha ka LSD, la nang duna ki masi ba iohpang
