Shillong, Jylliew 04: U President ka seng A’chik Holistic Awakening Movement (AHAM) Prince Ch Momin ula thoh sha u Myntri Rangbah ka jylla Conrad Sangma ban pynkynmaw halor ka jingdawa ban pynlong iaka Tura kum ka Nongbah Tlang ka Meghalaya.
Ka shithi ka ong “Ka AHAM ka kwah ban pynkynmaw haba iadei bad ka jingdonkam ban pynkylla noh iaka Tura kum ka nongbah tlang jong ka jylla namar ka Tura ka long ka nongbah ba donkam bha hapoh ka jylla bad ia kane ka jingdawa la dep ban phah ruh sha u Lat ka jylla hynrei haduh mynta ka sorkar kam pat jubab”.
“Phi tip ba kane ka jingdawa kadei kaba la slem naka bynta ki nongshong shnong ka Tura bad ka thain Garo baroh kawei bad kane ka jingdawa ka pynkynmaw haki por mynshwa haba kala don ka jingiateh hapdeng ki nongialam ka jylla kata Khasi, Garo bad Jaintia haka por ba iakhih jylla laka jong ban pynlong iaka Tura kum kawei naki nongbah ka Meghalaya kata naduh u bnai October haduh March bad Shillong naduh April haduh September. Haduh mynta ia kane ka jingiateh khlem pat burom bad kane ka pynduhnong iaki jaitbynriew Garo bad ka thain baroh kawei “.
Ki jaitbynriew Garos ki iapher na ki Khasis/Jaintias bad ka thong ban iakhlad naka Assam kadei hi ban pynneh iaka jinglong kyrpang bad kane ka jingpynlong iaka Shillong kum ka nongbah ka Meghalaya ka wanrah ka jingmyntoi tang iaki jaitbynriew Khasi/Jaintia namar bun ki kam pynroi ha ki bun ki liang ki leit lut tang ha rilum Khasi/Jaintia.
Ka jingsynshar ka ba biang tam kadei lyngba ka jingsam iaka bor synshar ha baroh ki liang bad lyngba ka jingpynkylla iaka Tura kum ka nongbah tlang ka Meghalaya kan wanrah shibun ki jingmyntoi iaka rilum Garo baroh kawei.
Ka jingsynshar ka ba biang kadei daka ba py iajan bad ki paidbah.
Ka jingpynkylla iaka Tura kum ka nongbah kan khring ia ki briew lane ki kompeni ban sengkam ha rilum Garo bad kane kan kyntiew iaka ioh ka kot naka bynta baroh lang.
Ka jingsam bor synshar kan wanrah ka jingshngain bad ka jingshaniah hapdeng kito kiba don haka sorkar bad ki paidbah.
Ka jingpynkylla iaka Tura kum ka Nongbah kan peit bniah iaka jingsam iaki kam pynroi hapdeng ka Khasi/Jaintia bad Garo hills.
Ka nongbah Shillong ka jngai palat iaki paidbah ka rilum Garo hills bad kane ka buh jingeh iaki paidbah ka thain ban leit donkam khamtam haba iadei bad ki jingdonkam haka roi ka par bad ka ioh ka kot.
Ka jingdon artylli ki nongbah ka don ruh ha kiwei ki jylla ka ri India na ka bynta ban rah ka jingshynshar ka ba bha ia barohlang.
Kiwei ki jylla ki ba don artylli ki nongbah ki kynthup ka Jammu & Kashmir, Himachal Pradesh, Andhra Pradesh bad ka Meghalaya kadei ruh ban bud nuksa ia kane.
