Shillong, Jylliew 23 : Ka Sorkar Jylla kala rai ban pynduh pyndam noh ia ka jingtyrwa ban shna ia ka surok 4-lane na Umiam sha Shillong namar ka jingbun palat ka jinglut ban shna ia kane ka surok.
Hynrei kala rai pat ba ha ka jaka jong kane ka project, kan shna noh da ka surok double-lane hynrei ka jingiar jong ka surok kan long 10 meter kynthup ka pavement.
Haba pyntip ia kane ha ka sngi Nyngkong, u Symbud Myntri Rangbah ba khmih ia ka Tnad PWD (Roads) Bah Prestone Tynsong ula ong ba ka National Highway and Infrastructure Development Corporation Limited (NHIDCL) kala sdang ia ka sorjamin bad pynkhreh ia ki kam ba donkam na ka bynta ka project 4-lane.
Hynrei, ha ka jingialang bad u Managing Director ka NHIDCL ha Delhi, la pyntip ba ka kaiphod bala pynkhreh malu mala ka pynpaw ba ka jinglut ha kaban kyntiew ia ka surok ka long kaba heh shaba palat.
“(Kumta) nga la pynlong ia ka jingialang bad ki Heh ka Tnad, bad ngi la rai ban pynsangeh noh ia ka jingtyrwa ban pynkylla ia ka surok Umiam sha Shillong kum ka surok 4-lane” ula pyntip.
“Hynrei mynta ngi la rai ban shna noh da ka surok double lane ha kane ka surok bala don lypa hynrei ka dei ban iar haduh 10 meter kynthup ka pavement” ula bynrap.
Kat kum ka jingong jong u, kane ka project ka thmu ban nang pynkhlain ia ki lad pyniasoh bad pynkylluid ia ka leit ka wan hapdeng ka Umiam bad Shillong.
